Нийслэлийн хэмжээнд цэргийн жинхэнэ алба хаах хугацааг дуусгаж, бэлтгэлээр халагдсан байлдагч, түрүүчийг хүлээн авах, цэргийн жинхэнэ албанд залуучуудыг татах, гэрээт цэргийн албанд элсүүлэх ажлыг энэ сарын 21-23-ны өдрүүдэд зохион байгуулахаар Нийслэлийн Засаг дарга бөгөөд Улаанбаатар хотын Захирагч С.Батболд захирамж гаргасан. Үүнтэй холбогдуулан Нийслэлийн цэрэг татлагын товчооны бүрэлдэхүүн өнөөдөр хуралдаж, цэрэг татлагын бэлтгэл ажлын талаар танилцууллаа.

Нийслэлийн хэмжээнд цэрэг татлагын ажил бүрэн хангагдсан, цэрэг татлагын товчоодод 2 579 албан тушаалтан томилогдон ажиллана. Цэргийн жинхэнэ албаны “Зарлан дуудах хуудас”  95 хувьтай тараагдаж,  эзэндээ хүрсэн гэж нийслэлийн Цэргийн штабын орлогч Ш.Анхбаяр танилцуулаа. Гэрээт цэргийн албанд нийслэлийн хэмжээнд 79 иргэн элсүүлэхээс 119 иргэн гэрээт цэргийн албанд элсжээ. Сум дүүргийн ИТХ-ын ээлжит сонгуулийн ирц хангалтгүй байснаас зарим дүүрэг, хороодод дахин санал хураалт явуулахаар болсон. Тиймээс сонгуулийн санал авах байртай давхцаж байгаа цэрэг татлагын байруудыг өөрчлөх хэрэгтэй болсон байна. Нийслэлийн Эрүүл мэндийн газрын дарга Л.Төмөрбаатар “2015 оны 2 ээлжийн цэрэг татлагаар орсон залуусын 33,7 хувь эрүүл мэндийн шалтгаанаар цэргийн албанаас чөлөөлөгдөж байсан.  Эрүүл мэндийн шалтгааны улмаас цэргийн албанд тэнцэхгүй байгаа залуусын дунд мэс засал, дотор, чих, хамар хоолой, сэтгэцийн өвчин голлож байна” гэлээ.  

Түүнчлэн жил бүр эрүүл мэндийн шалтгааны улмаас цэргийн албанаас чөлөөлөгдөх залуучуудын тоо буурахгүй байгааг онцлов.  Нийслэлийн цэрэг татлагын товчооны хурлаас цэргээс халах, цэрэг татлагын үед нийгмийн хэв журам хамгаалах, гэмт хэрэг, зөрчлөөс урьдчилан сэргийлэх, аюулгүй байдлыг хангах арга хэмжээг авч хэрэгжүүлж, цэрэгт татагдагсдыг тээвэрлэх автомашины техникийн бүрэн бүтэн байдалд үзлэг, шалгалт хийж, жолооч нарын үүрэг, хариуцлагыг дээшлүүлэн, хөдөлгөөний аюулгүй байдлыг ханган ажиллахыг холбогдох байгууллагуудад даалгалаа. Мөн цэрэг татлагын зарим байрууд солигдож байгаа учир өнөөдрийн 15:00 цагаас өмнө байруудын бэлэн болгохыг  үүрэг болгов гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.