Уул уурхайн үндэсний тэргүүлэгч оператор “Хишиг Арвин Индустриал” компани нь Австралийн уул уурхайн дэлхийд тэргүүлэгч “Тийсс” компанитай хамтран "Рио Тинто" компанийн хэрэгжүүлж байгаа дэлхийд томоохонд тооцогдох "Оюу Толгой"-н зэс, алтны уурхайн налуу ам барих төслийн гүйцэтгэгчээр шалгарсан билээ.

Өнгөрөгч сард гүний уурхайн ам нээх ажлыг амжилттай хийж гүйцэтгэн, гүний уурхайн үндсэн бүтээн байгуулалтын ажилдаа оржээ. 2020 он хүртэл үргэлжлэх уг төсөл нь дэлхийн түвшний зэс, алтны уурхайн төсөлд хувь нэмрээ оруулж буй томоохон ажил болоод байна.

Мөн хоёр компанийн түншлэлээр дамжуулан төсөлд ажиллах хүчний 90 хувийг Монгол ажилтнуудаас бүрдүүлэх аж.  Ингэснээр дэлхийн хэмжээнд бэлтгэгдсэн, гүний уурхайн мэдлэг, туршлага бүхий дотоодын хүний нөөцийг олноор төрүүлэн гаргах өндөр ач холбогдолтой гэнэ.  

Энэхүү гүний уурхай нь газрын гадаргаас 1,300 метр гүн хүртэл явагдах бөгөөд нийт 200 километрийн урттай үйлчилгээний болон туузан дамжлагын туннель барьж босгох бүтээн байгуулалт юм. Энэ нь Монголдоо цоо шинэ төсөл болж байгаагаараа онцлогтой.