УИХ-ын Төсвийн байнгын хорооны ээлжит хуралдаанаар  "Монгол шуудан", "Эрдэнэт-Булганы цахилгаан түгээх сүлжээ" ТӨХК-иудыг хувьчлах асуудлыг хэлэлцсэн.

Үүнтэй холбогдуулан  Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай УИХ-ын 2015 оны 07 дугаар сарын 03-ны өдрийн 70 дугаар тогтоолын хавсралтын 4 дүгээр зүйлд “Монгол шуудан” ТӨХК-ийг 20 тэрбум, “Эрдэнэт-Булганы цахилгаан түгээх сүлжээ” ТӨХК-ийг 30 тэрбум төгрөгөөр хувьчилна гэж заажээ. Энэ тал дээр УИХ-ын гишүүн Т.Аюурсайхан гишүүн байр сууриа илэрхийллээ.

Тэрбээр " Монгол шуудан ТӨХК нь Төв шуудангийн барилгын 40 хувийг эзэмшдэг, 21 аймаг, 330 суманд өөрийн барилга байшинтай, 130 автомашинтай, 1000 ажилчинтай.

Мөн саяхан IPO гаргаж дансандаа бэлэн 6.1 тэрбум төгрөгтэй, жилдээ 10 тэрбум төгрөгийн борлуулалттай, ашигтай ажиллаж байгаа компани. Монгол шууданд таван тэрбум төгрөгийн марк байна.

Марк гэдэг бол төгрөгтэй ижил хэмжээний өртөгтэй үнэт зүйл. Гэтэл Монгол шууданг хувьчилбал аймаг, сумдын багуудад шуудангийн үйлчилгээ хүрэхээ болино. Иймээс хувьчилсан ч ядаж шуудангийн  51 хувь нь төрд байх ёстой гэсэн байр суурьтай байна. Үлдсэн хувийг нь хувьчилж болно" хэмээсэн юм.