Сонгуулийн ерөнхий хорооны удирдлагууд дөнгөж сая мэдээлэл хийлээ. Тэд УИХ болон аймаг, нийслэл, сум, дүүргийн ИТХ-ын сонгуулийг Сонгуулийн тухай нэгдсэн хуулиар зохион байгуулсан бөгөөд шинэ хуулиар сонгууль зохион байгуулахад ямар хүндрэл бэрхшээл тулгарсан талаар мэдээлсэн юм.

Энэ үеэр СЕХ-ны дарга Ч.Содномцэрэн “2016 оны бүх шатны сонгуулийг явуулсан туршлагаас харахад Сонгуулийн тухай хуулийг өөрчлөх шаардлагатай гэж үзэж байна. Бүх сонгуулийн хуулийг “нэг малгай” дор багтаан сонгууль зохион байгуулах нь зохимжгүй юм байна. Гэхдээ зөвхөн Ерөнхийлөгчийн сонгуульд нийт сонгогчдын 50 хувиас дээш гэдэг босго байх ёстой.

Мөн сонгууль болохоос өмнөх зургаан сарын дотор хуулиа өөрчлөхгүй байх заалтыг хассан нь буруу зүйл болсон. Үүнтэй холбоотойгоор сонгууль товлон зарласны дараа хуульдаа өөрчлөлт оруулсан. Тиймээс цаашдаа энэ заалтыг буцааж сэргээх хэрэгтэй. Үүнээс гадна нэг тулгамдсан асуудал бол сонгогчдын ирц байлаа. Бусад улс орнуудад саналаа өгсөн иргэдийн олонхийн саналыг авсан нь сонгогддог. Харин манайд нийт сонгогчдын 50-иас дээш хувийн саналыг авч ялалт байгуулдаг. Цаашдаа олон улсын жишгийг дагах нь зөв байх. Гэхдээ зөвхөн Ерөнхийлөгчийн сонгуульд нийт сонгогчдын 50 хувиас дээш гэдэг босго байх ёстой” хэмээлээ.