Төрийн ордны баруун талд байрлах “Хэлмэгдэгсдийн хөшөө”-г эвдэж сүйтгэсэн талаарх мэдээллийг Чингэлтэй дүүргийн Засаг даргын тамын газарт өнгөрсөн долоо хоногт иржээ. Энэ талаар Цагдаагийн байгууллагад ямар нэгэн гомдол бүртгэгдээгүй аж.

Энэхүү хөшөөг 1994 онд уран барималч Л.Болдын зураг төслөөр бүтээжээ. Дөрвөлжин хар өнгөтэй шоо нь хүний эрх чөлөөг хааж боон нэгэн хэв загварт барьсан байдлыг илэрхийлсэн нүсэр ханыг илэрхийлж, дотор нь тэрхүү ханыг нураахыг хүссэн, эрх чөлөөний төлөө тэмцэж тэмүүлсэн хүмүүний дүрийг илэрхийлсэн байдаг. Гэтэл уг түүхэн дурсгалт хөшөөг үзүүртэй мэс зүйлээр цоолон гэмтээсэн байна.

Мэдээллийн дагуу   тус дүүргийн засаг даргын тамгын газар болон дүүргийн соёлын төвөөс ажлын хэсэг гаргаж судалгаа хийж эхэлжээ. Хэрэв санаатайгаар эвдэж, гэмтээсэн нь тогтоогдвол Эрүүгийн хуулинд заасанчлан тухайн этгээдэд хариуцлага тооцох юм байна.

1990 оноос хойшхи Нийслэлийн анхны модернист чиглэлийн энэ  хөшөө нь тэртээ он жилүүдийн гомдол харуусал, үнэнийг хайсан цөхрөл, олон жил хураасан нулимс, маш олон үндэсний сэхээтэн, эрдэмтэн лам нарын амьдрал амь насаар тоглосон гунигт түүхийн гэрч болон бүтээгдсэн түүхтэй.

Хэлмэгдэгсдийн хөшөөг зэс хөөмлийн аргаар урласан бөгөөд урт ба өргөн нь 5м, өндөр нь 6.5м, хүндийн жин нь 7-8 тн жинтэй хөшөөг гантиг чулуу, төмөр, зэсээр бүтээжээ. 

НИТХ-ын 2007 оны 197-р тогтоолоор болон тухайн дүүрэг түүхэн дурсгалын хөшөө барималыг хамгаалалтандаа авна гэсэн хуулийн заалтын дагуу Чингэлтэй дүүргийн хамгаалалтад авсан байна.