Он гарсаар эхний 10 сарын хугацаанд орон даяар үйлдэгдсэн нийт гэмт хэргийн 60-70 хувь нь нийслэл хотод үйлдэгддэг гэж  Улаанбаатар хотын цагдаагийн газрын дарга Ж.Эрдэнэболд мэдээлэв.

Улаанбаатар хотын Цагдаагийн газараас өнөөдөр он гарсанаас хойш эхний 10 сард үйлдэгдсэн гэмт хэргийн үзүүлэлт, түүний шалтгаан нөхцөлийн талаар мэдээлэл хийсэн юм.

Нийслэлийн хэмжээнд хоногт 70-80 гэмт хэрэг бүртгэгдэж байгаагаас 450-500 орчим нь согтуугаар үйлдэгдсэн, 400-450 орчим нь авто тээврийн ослын хэрэг дуудлага ирдэг байна.  Эдгээр гэмт хэргийн үзүүлэлтээс үзэхэд хүүхэд холбогдсон гэмт хэргийн гаралт 11 хувиар буурсан эерэг үзүүүлэлттэй байгаа бол хулгайн гэмт хэргийн гарал өмнөх жилийн мөн үеийнхээс өсчээ.

Хулгайн гэмт хэрэг нэмэгдэж байгаа гол шалтгаан нь ломбард гэдгийг цагдаагийн газраас онцлов.

Хулгайн гэмт хэрэг нэмэгдэж байгаа гол шалтгаан нь ломбард гэдгийг цагдаагийн газраас онцлов. Учир нь хулгайн эд зүйлсийг худалдах, зарж борлуулах гол эх үүсвэр нь болдог аж.

Дээрх гэмт хэргүүдээс үүдэн иргэн аж ахуйн нэгжид 109 төрбум төгрөгийн хохирол учирч, цагдаагийн байгууллагаас хохирлыг барагдуулах, эд хөрөнгө хураах гэх мэт ажлуудыг хийж гүйцэтгэж байгаа аж. Иймд ломбард буюу барьцаалан зээлдүүлэх үйл ажиллагаа явуулдаг газруудын мэдээллийн цахим бүртгэл, хяналтын системийг бий болгохоор ажиллаж эхэлжээ.

Давхар энэ үйлчилгээ эрхэлж байгаа хүмүүс өөрсдөө хохирогч болохгүйн тулд зайлшгүй цагдаагийн байгууллагатай хамтран ажиллах хэрэгтэйг Ж.Эрдэнэболд онцолсон юм.

Улаанбаатар хотод үйлдэгдсэн нийт гэмт хэргийн 49 хувийг хөнгөн, 48 хувь нь хүнд хүндэвтэр гэмт хэрэг эзэлж байгаа бол 1.9 хувийг онц хүнд гэмт хэрэг эзэлжээ.

Ирэх 2017 онд цагдаагийн байгууллагаас нийслэл хотын хэмжээнд гэмт хэрэг ихээр үйлдэгддэг цэгүүдийг тодорхойлж, тухайн цэгт ямар гэмт хэрэг зонхилон гарч буйг урьдчилан тооцоолж, хэрэг гарсны хойно биш өмнө нь гэмт хэргээс урьдчилан сэргийлэх чиглэлээр ажиллах талаар дуулгав.

Ингэхдээ олон улсын цагдаагийн байгууллагад ашиглагддаг орчин үеийн техник технологийг ашиглан, цаг агаарын урьдчилсан мэдээтэй ижил гэмт хэргийн урьдчилсан мэдээлэл гаргаж сэргийлж ажиллах юм байна.