Иргэд халамж, тэтгэврээ авахдаа зөвхөн тухайн сонгосон банкиар үйлчлүүлсэнээр цаг хугацаа алдахын дээр зөвхөн нэг, хоёр банкинд ачаалал үүсдэг талаар Хөдөлмөр Нийгмийн хамгааллын сайд Н.Номтойбаяр өмнө нь хэлж байсан удаатай. Тэгвэл дээрх асуудал үгүй болжээ. Тодруулбал, энэ сарын 15-наас эхлэн нийгмийн даатгалын сангаас болон цэргийн тэтгэврийг шинээр тогтоолгох иргэд тэтгэвэр авах банкаа өөрөө чөлөөтэй сонгох боломж бүрдсэн байна. 

Хөдөлмөр, нийгмийн хамгааллын сайдын энэ сарын 07-ны А/233 тоот тушаалаар нийгмийн даатгалын сангаас болон цэргийн тэтгэвэр авагч тэтгэвэр авах банкаа сонгох боломж бүрджээ. Энэ хүрээнд Эрүүл мэнд, нийгмийн даатгалын ерөнхий газраас тэтгэвэр авагч тэтгэвэр авах банкаа сонгох, өөрчлөхтэй холбоотой үйлчилгээ үзүүлэх журмыг баталсан байна.

Иймд тэтгэвэр авч байгаа банкаа солих сонирхолтой иргэн хүсэлтээ ирэх сарын 15-наас эхлэн харьяа Эрүүл мэнд, нийгмийн даатгалын хэлтэстээ гаргаж болох аж.