Монгол Улсын Гавьяат дасгалжуулагч Ц.Цогтбаяр Монголын чөлөөт бөхийн холбооны үйл ажиллагаа, шийдвэрийг эсэргүүцэн зулын гол болно гэдгээ өнөөдөр мэдэгдлээ.

Монголын чөлөөт бөхийн холбооны их хурал “Чингис” зочид буудалд болох байснаа Төрийн ордонд болохоор болж өөрчлөгдсөн байна.

Төрийн ордонд их хурлаа хуралдуулахаар товлосон нь Ц.Цогтбаяр, Б.Баяраа нарын зарим хүмүүсийг хуралд оролцуулахгүй байх үүднээс ийм шийдвэр гаргасан хэмээн тэрбээр үзэж “Надад өөрийгөө шатааж, тэмцлийн хурц хэлбэрийг сонгохоос өөр зам үлдсэнгүй” хэмээсэн байна. Тэрбээр Монголын чөлөөт бөхийн холбооны их хурал болох өдөр буюу энэ сарын 19-ний өдөр Төрийн ордоны өмнө өөрийгөө шатааж эсэргүүцлээ илэрхийлэхээр болсон байна.

Дашрамд өгүүлэхэд дасгалжуулагч Ц.Цогтбаяр, Б.Баяраа нар өнгөрсөн зун Риогийн олимпийн наадмын үеэр Г.Мандахнаран тамирчнаа өмөөрч, хувцасаа тайлан эсэргүүцлээ илэрхийлж байсан. Тэрхүү үйлдлээс үүдэж, хоёр дасгалжуулагчийн эрхийг гурван жилээр хасаж, Монголын чөлөөт бөхийн холбооны ямар ч үйл ажиллагаанд оролцуулахгүй байхыг сануулсан билээ.