Ерөнхий сайд асан Н.Алтанхуягийн төрсөн дүүг энэ сарын 16-нд онгоцны буудлаас баривчилж, өдгөө ШШГЕГ-ын харьяа хорих 461-р ангид цагдан хориод байгаа.

Тиймээс өмгөөлөгч нь Н.Наранцэцэгийг хууль бусаар хорьсон гэж үзэж гомдол гаргажээ. Гомдлыг хэлэлцэн үзээд Н.Наранцэцэгийг үргэлжлүүлэн хорих шийдвэр гаргасан байна. Н.Наранцэцэгийг албан тушаалаа урвуулан ашигласан хэмээн үзэж Эрүүгийн хуулийн 150, 263-т зааснаар эрүүгийн хэрэг үүсгэн шалгаж байгаа аж.

Тэгвэл энэ талаар Н.Алтанхуяг "Гэр бүлийн маань олон хүнийг ар араас нь баривчилсаны дараа өнгөрсөн долоо хоногт үлдсэн дүү нартайгаа уулзах гээд очсон. Би тэднийхээ өмнө хэрэг хийсэн юм шиг гэмэрхэн орсон юм. Тэгсэн гэрийхэн  маань "Ах аа, биднийг баривчлах яах вэ, энэ байтугайг бид даваад гарна. Харин та луйварчдад хэрхэвч бууж өгч болохгүй шүү" хэмээн хэлсэн.  Тиймээс ч би нам дамнасан бүлэглэлтэй үхэн үхэтлээ тэмцэнэ" хэмээн мэдэгдсэн юм. Ямартай ч олны анхааралд буй энэ асуудлын учиг удахгүй тайлагдах буй за.