Сүүлийн таван жилийн хугацаанд нийслэлийн автомашин 145.330 болон нэмэгджээ. Өөрөөр хэлбэл,  2012 онд автомашиныг дугаарын хязгаарлалттайгаар хөдөлгөөнд оролцуулах тухай Нийслэлийн засаг даргын захирамж хэрэгжиж эхлэх үед нийслэл 321.347 автомашинтай байв.

Харин өнөөдөр 466.677 автомашин хөдөлгөөнд оролцож байна. Энэ хэрээр автозамын түгжрэл иргэдийн толгойны өвчин болж байгаа. Түгжрэл гэдэг үгийг авто замын орчинд хэрэглэдэггүй, зөвхөн эрүүл мэндийн салбарт болон бусад үед хэрэглэдэг байсан нь ердөө 2005 он. Энэ үед Улаанбаатар хотод 73.740 тээврийн хэрэгсэл, бүртгэлтэй байсан ба нийслэлийн авто замд түгжрэл үүсдэггүй байжээ.

Дэлхийн 415 дахь том хотоор Улаанбаатар хот олон улсын жагсаалтанд аль хэдийн оржээ. Улаанбаатар хот өнөөдрийн байдлаар 1,3 сая хүн амтай.

Хотын автозамын түгжрэлийг бууруулах зорилгоор Хотын дарга асан Э.Бат-Үүл нийслэлийн авто замын түгжрэлийг багасгах гэж арга ухаанаа уралдуулж, олон ч янзаар үзсэн. Тухайлбал, дугаарын хязгаарлалт хийв, нэгдүгээр эгнээгээр зорчихыг хориглов, зөвшөөрөлгүй газар зогссоныг нь "ачиж", автомашины дугуйг хүртэл түгждэг боллоо. Бүр төмөр замаар "райлбус" явуулсан гээд дурдаад байвал их юм бий.

Нийслэлд зохицуулалттай 125 уулзвар байдагаас хамгийн их ачаалалтай тээврийн хэрэгсэл, явган зорчигч зорчдог уулзваруудын нэг баруун дөрвөн зам. Тэгвэл түгжрэлийг бууруулах, хотын өнгө үзэмж, аялал жуулчлалын салбарт хувь нэмэр оруулах зорилгоор  төв дөрвөн замын уулзвар дээрх гүүрэн гарц барих санаачилгыг “Сая санаа” ХХК-ны  сайн дурын залуус нэгдэн  гаргажээ.

Энэхүү гүүрэн гарц нь хотын өнгө үзэмжинд хувь нэмрээ оруулах чухал ач холбогдолтой аж. Архитектур, дизайнеруудын гаргасан тус гүүрэн гарцны төлөвлөлт  нь  орчин үеийн шинэлэг шийдлийг цогцлоосноороо онцлогтой.

Гүүрэн гарцны төлөвлөлтөд  дэлгүүр, кофе шоп, Монгол хоол, түргэн хоол бүхий үйлчилгээний бүс, олон нийтийн чөлөөт бүс, амралтын бүс зэргийг багтаажээ. Гэвч энэхүү төслийг өнөөдөр анхааралдаа авч хэрэгжүүлэн ажил болгох нь хотын удирдлагууд болоод эрхэм гишүүдэд чухал байна.

Хэрвээ  дээрх  төслийг санаачилсан бүтээлч залуусын  гүүрэн гарцыг хэрэгжүүлэхэд хотын удирдлагууд дэмжээд өгвөл Нийслэл хотын өнгө үзэмжинд сайнаар нөлөөлөх нь дамжиггүй.