Дээрхийн гэгээн XIV Далай лам Данзанжамц манай улсад энэ сарын 18-22-ны өдрүүдэд дөрөв хоногийн айлчлал хийхээр ирсэн юм. Айлчлалын үеэрээ сүсэгтэн олонд ховор ном айлдахын сацуу X Богдыг тодруулах асуудал олны анхааралд өртөөд байв. Тэгвэл X Богдыг тодруулах таамаглал оргүй зүйл биш ажээ.

XIV Далай лам  өчигдөр Их тэнгэрийн аманд хийсэн хэвлэлийн бага хурлаараа  албан ёсны айлчлалаа өндөрлөсөн. Түүний сэтгүүлчдэд өгсөн мэдээллийн үеэр хэлсэн онцлох 24 ишлэлийг хүргэе.

Баримт 1. Би Түвд хүн. Түвдийн улс төрийн тэргүүний ажлаа би 2011 онд шилжүүлж өгсөн. Сонгуулиар сонгогдсон хүн цаашид улс төрийн тэргүүний ажлыг авч явна.

Баримт 2. Хамгийн сүүлд IX Богд Жавжумдамба хутагттай уулзсан минь гайхамшигтай тохиол байлаа. Би түүнд  таны дараагийн төрөл авах газар Монгол шүү” гэж айлтгасан юм.

Баримт 3.  X Богдын дараагийн дүрийг тодруулах нь миний гарцаагүй үүрэг.

Баримт 4.  IX Богд Жавзундамбын дараагийн дүр  Монголд мэндэлсэн шинж, тэмдэг илэрсэн. Гэхдээ хүүхэд балчир байгаа учраас одоохондоо нийтэд зарлах шаардлагагүй.

Баримт 5. Би Түвд хүмүүст “Өндөр суудалд сууснаар шашныг авч явдаггүй юм шүү” гэж хэлдэг.

Баримт 6.  Миний бие ес дөх удаагаа Монголд айлчилж байна. Энд ямар ч улс төрийн зорилго байхгүй. Цэвэр шашны айлчлал. Монголд дахин айлчилж байгаадаа би туйлын их баяртай байна.

Баримт 7. Монголын Богд Жэвзундамба  хутагт бол агуу түүхтэй лам. Урьд урьдын далай ламуудтай ч барилдлагатай хүн байсан.

Баримт 8. Бурханы ном сургаалыг зөвхөн сүсэглэх төдийгөөр авч явах боломжгүй, учир шалтгааны үүднээс судалж, ойлгож авч явах ёстой.

Баримт  9. Төвдийн шашин, соёл хэл бичиг, үүнийг хамгаалах, түүний орчныг бас доройтуулахгүй авч явах үүргийг би үхэхийг хүртэл хийх болно.

Баримт 10. Монгол, Түвд орны хувьд 3000 жилийн өмнөөс холбоотой, барилдлагатай байсан ард түмэн. Түвдийн шашин дэлгэрэхээс өмнө ч бид холбоотой байсан болов уу.

Баримт 11. Эртнээс хэлж ирсэн үгээ одоо ч хэлье. Та бүхэн номд сайн суралцаарай

Баримт 12. Түвдэд том лам, хувилгаан гэхээр эрдэм, ном нь аяндаа бий болчихсон юм шиг яриа байдаг.  Тиймээс бид энийг өөрчлөх ёстой. Энэ бол хоцрогдол.

Баримт 13. Удахгүй АНУ-д хүрэлцэн ирнэ үү гэсэн урилга ирэх байх. Тэр үед нь би айлчилж очно.

Баримт 14. Х Богд нялх, жаахан байна. Гурав, дөрөв, таван нас хүрэхэд нь бодолцох хэрэгтэй. Жаахан хүүхдийг сэнтийд залах хэцүү. Том болоод ном эрдэмд гэгээрч, олонд тусыг хүргэх учиртай.

Баримт 15. Намайг хаана ч очсон Хятадын зүгээс ийм асуудал байнга тавьдаг. Би энэ дэлхийн бурхны шашинтай улсуудаас Монгол, Японд л чөлөөтэй ирж, очиж чаддаг.

Баримт 16. Би бурхны шашинтай хүн ч бурхны шашинтай улсад очиж чадахгүй байна гэдгийг тоглоом, шоглоом болгон хэлдэг.

Баримт 17. Би 1974 оноос хойш Түвдийн тусгаар тогтнолын асуудлыг дэвшүүлэхгүй байгаа. Хятадын засгийн бодлого бол намайг салан тусгаарлагч гэж үздэг.

Баримт 18. Зарим хүн “Түвдийг тусгаар улс болгохын төлөө явахгүй байна” гэж намайг буруутгадаг.  Би анхнаасаа “Бид ялна, тэд ялагдана” гэсэн санаагаар бус хоёр улсад  харилцан тустай байх юмсан гэсэн бодлоор хандаж ирсэн.

Баримт 19. Би Далай лам гээд хүнтэй дээрээс харилцах нь утгагүй. Бурхны сургаальд хуврагууд бурхны шашныг авч явна гэсэн болохоос биш ганц лам гээгүйг санах хэрэгтэй.

Баримт 20. Ванчин Богд одоогоор хоёр болчихоод байна. Ирээдүйд миний дүрийг ч хоёр тодруулж магадгүй шүү. /инээв/

Баримт 21. Надад одоо улс төрийн үүрэг, хариуцлага байхгүй болсон. Харин номын үйл хэргийг авч явах үүрэг үлдсэн.

Баримт 22.  Дэлхий дээр долоон тэрбум хүн байдаг. Тэд зовлонг эс хүсч амар амгаланг хүсдэг. Гэвч зовлонгийн шалтгаан нь уур хилэн, хүсэл, шунал юм.

Баримт 23.  Би аль ч улсад айлчилсан хамгийн эхний үүрэг хариуцлага маань дэлхийд энх тайвныг тогтоох, амар амгаланг түгээх.

Баримт 24. Монгол оронд шашин шүтэх, шашны ном үзэх хориотой байсан ч өнөөдөр сайхан цаг ирсэн.

24tsag.mn