Эрдэнэт үйлдвэр ХХК-ийн Ерөнхий захирал Ц.Даваацэрэн өчигдөр ажлаа хүлээлгэн өглөө. Тэрбээр Зэсийн үнэ буурч компаний өөрийн өртгөөс доош орсон хүнд үед зөв бодлогоор Эрдэнэт үйлдвэрийг амжилттай удирдаж байсан юм.

Тодруулбал, дэлхийн зах зээлд зэсийн үнэ буурч үйл ажиллагаанд сөргөөр нөлөөлсөн хэдий ч Эрдэнэт үйлдвэр 2013-2016 оны 10-р сарын байдлаар нийт 1,5 их наяд төгрөгийн татварыг улс болон орон нутгийн төсөвт төвлөрүүлсэн бөгөөд үйлдвэрлэлийн төлөвлөгөөг тогтмол давуулан биелүүлж амжилттай ажилласан байна.

Хэмнэлтийн бодлогын үр дүнд 1 тонн зэс үйлдвэрлэх тооцоот өөрийн өртгийг 2012 онтой харьцуулахад 2343 ам.доллароор бууруулж 2016 оны 10-р сарын байдлаар 3717 ам.доллар болгосны үр дүнд нийт дүнгээр сүүлийн 4 жилд 379 тэрбум төгрөгийн хэмнэлтийг хийжээ.

Судалгаанаас үзэхэд дэлхийн хэмжээнд 1 тонн зэс үйлдвэрлэх өөрийн өртөг дунджаар 3986 ам.доллар аж.

Мөн компанийн хэмжээнд авлага, өглөгийг бууруулах цогц арга хэмжээ авч хэрэгжүүлсний үр дүнд өнөөдрийн байдлаар нийт авлагын хэмжээг 2012 онтой харьцуулахад 67 хувиар, нийт өглөгийн хэмжээг 13 хувиар тус тус бууруулсан байна.

Компанийн үйлдвэрлэлийн үр ашгийг нэмэгдүүлэх, өртөг зардлыг бууруулах, хямралын эсрэг арга хэмжээг амжилттай хэрэгжүүлж, 1 тонн цэвэр зэсийн өөрийн өртгийг олон улсын зэсийн уурхайн компаниудын дундаж өөрийн өртгийн хэмжээнд хүртэл бууруулахад нийт компанийн ажилтнуудын оруулсан бодит хувь нэмэр, идэвх оролцоог өндрөөр үнэлэн цаашид бүтцийн нэгжүүд болон ажилтан бүрийн хүчин чармайлтыг нэмэгдүүлэх зорилгоор сүүлийн 4 жилд 1 ажилтанд нийт 4,05 сая төгрөг буюу компанийн бүх ажилчиддаа нийт 32,5 тэрбум төгрөгийн урамшууллыг ажилчиддаа олгожээ.

Компанийн өөрийн өртгийг бууруулах зорилгоор үйлдвэрлэлийн хүдэр боловсруулах хүчин чадлыг 6 сая тонноор нэмэгдүүлсэн ба 48 мвт цахилгаан үйлдвэрлэх төслийн хэрэгжилтийг эхлүүлсэн, баяжуулах фабрикийн хаягдлын аж ахуйд хийгдсэн бүтээн байгуулалтууд, импорт орлох бүтээгдэхүүний үйлдвэрлэлийг нэмэгдүүлсэн, 2025 он хүртэлх үйлдвэрийн хөгжлийн концепци болон компанийн хаалт хөгжлийн менежментийн бодлогыг боловсруулсан зэрэг олон ажлуудыг амжилттай удирдан зохион байгуулсан нь зэсийн үнэ буурсан хүнд үед компани хэвийн, амжилттай ажиллах боломжийг бий болгосон гэх зэргээр түүний зөв бодлого, зөв хандлага Эрдэнэт үйлдвэрт олон талын өгөөжөө өгсөн юм.