“Хар сарнай” хамтлагийн ахлагч, дуучин С.Амармандах энэ сарын 22-нд  хүнд ноцтойгоор зодуулсан хэрэг гарсан талаар бид мэдээлсэн билээ. Тэгвэл энэ асуудалтай холбогдуулан  дөнгөж сая түүний ар гэрийнхэн нь мэдээлэл хийлээ. Хэвлэлийн бага хуралд С.Амармандахын аав С.Сүхбаатар, Хар сарнай хамтлагийн дуучин Б.Баяржаргал, өмгөөлөгч Г.Батбаяр нар хүрэлцэн ирсэн юм.

 
Хэвлэлийн бага хурлын эхэнд С.Амараагийн аав С.Сүхбаатар "Одоогоор түүний биеийн байдал маш хүнд байгаа" онцолсон. Түүний хэлснээр С. Амараа тархиндаа маш хүнд гэмтэл авсан бөгөөд тархинд нь нөж хурсан байдалтай байгаа аж. Хэрэв энэ нөж шингэрч гарахгүй бол хагалгаа хийлгэх шаардлагатай гэдгийг эмч нар хэлжээ. Өчигдөр буюу  арванхоёрдугаар сарын 1-нд оёдлуудаа авахуулсан байна. Цаашид 10 гаруй хоног  ямар ч хөдөлгөөнгүй хэвтэх шаардлагатай байгаа аж.

 
Тэгвэл тухайн өдөр  болсон талаар урлагийн ажилтны холбоог төлөөлж ирсэн "Дуу бүтээгчдийн үндэсний төв"-ийн тэргүүн Б.Лхагвасүрэн “11-р сарын 22-нд нийслэлийн тодорхой удирдлагуудын санаачилсан “Аз жаргалтай Улаанбаатар” гэх баярын үйл ажиллагаа болсон. Уг үйл ажиллагаанд хамтлагаараа  уригдан очиж, дуулсан байна. Улмаар тайзан дээр “Аз жаргал хүсье”, “Би Монгол хүн” дуугаа  дуучин Б.Оюунжаргалын хамт дуулжээ. Мөн  “Үзэсгэлэнт бүсгүй” дууг дуулсан байна. Дуунуудаа дуулахдаа хас тэмдэгтэй үндэсний  дээлээ өмсжээ. Ингээд тайзнаас буусны дараа нийслэлийн удирдлагуудын урьснаар тайзны хувцасаа сольж ёслолын хувцас /костюм/ өмссөн байна. Ингээд дурсгалын зураг татуулжээ. Үүний дараа С.Амармандах гэртээ харихаар гарах үед дөрвөн давхарын  цахилгаан  шат руу явах үед  цагаан цамцтай хүн металь зүйлээр  араас нь цохиж унагажээ. Эхний цохилтоор С.Амармандах ухаан балартаж унасан байна. Улмаар хэрэгтэн балмадаар зоджээ. Энэ үед  баарны бармен ирж  салгасан байна. Б.Оюунжаргалтай  “Би Монгол хүн” дууг дуулж байх үед Монгол улс мандтугай гэж уухайлж байжээ.  Харин энэ үед заалнаас цагаан цамцтай гадаад хүн “фашист фашист” гэж орилж байсан байна” гэлээ. Тэрбээр хэргийн холбогдогч тодорхой ганц л хүн байгаа. Үүнийг холбогдох хуулийн байгууллагынхан шалгаж байгаа учраас иргэд маань ОХУ-ын жирийн иргэд рүү дайрч доромжлохгүй байхыг хүсэж байна гэв.

 
Харин С.Сүхбаатар “Ярихад аавынх нь хувьд маш их зүйл ярьмаар байна. Гэхдээ надад маш хүнд байна.Би арваад хоногийн хугацаанд Амармандах гэдэг хүүг таниагүй.Та нарын таньдаг тэр Монгол хүн биш, зодуулж, занчуулж байгаа хүнийг харлаа. Зодож байгаа сахалтай гадаад хүнийг харлаа. Би хүүгийнхээ царай дүрсийг таниагүй. Одооноос харин буцаад хүн төрхөндөө орж байгаа  хүүгээ Гэмтлийн эмнэлгийн эмч нарын ачаар таньж эхэллээ. Та бүхэн тэр дүрслэлийг хараарай. Монгол хүнийг  нутагт нь хоёр улсын дипломат ёсыг эвдэж, сахалтай нөхөр ийм зүйл хийлээ. Энд хоёр улсын харилцааг ярих шаардлагагүй . Хувь хүний л хийсэн үйлдэл. Мөн хас тамгыг маш буруугаар ойлгуулж байна. Энэ бол хас буу тамгаараа Монгол улсаа тамгалаж дэлхийд таниулж байсан хээ угалз шүү дээ. Ийм л билэг дэмбэрэлийг бодож үүгээр омогшдог” гэсэн юм.

 
Хар сарнай хамтлагийн дуучин Баяржаргал "Найзыгаа зодуулсныг сонсоод маш ихээр балмагдсан. Хамт дуулаад 25 жил  болж байна. Тоглолтоо хийхдээ, эхлүүлэхдээ эх орноо мандан бадраасай, хөгжөөсэй гэж уухайлж эхлүүлдэг. Нэг ч удаа  хүмүүсийн ярьж байгаа шиг ёс бус хэллэг хэлж байгаагүй. Хэлэх ч үгүй гэдгийг би батлан хэлмээр байна. Эцэст нь нэг зүйл хэлэхэд Монголын  хуулийнхан энэ асуудлыг үнэн зөвөөр шийдээсэй гэж хүсэж байна".