“Монголын эх баригч, бага эмч нарын II чуулган” өнөөдөр болж байна. Тэрбээр суурь судалгааны үр дүн, зөвлөмжид үндэслэн эх барихын яаралтай тусламжийн чанарыг сайжруулах, эх барихын тусламж, үйлчилгээний бодлогын орчинг боловсронгуй болгох, өнөөгийн байдалд дүгнэлт хийж, цаашдын зорилтын талаар хэлэлцэж байна.

Эх баригчдын II чуулганыг ЭМЯ, Монголын эх баригч, бага эмч нарын нийгэмлэгтэй хамтран НҮБ-ын Хүн амын сан, Франц улсын Санте Сюд  төрийн бус байгууллагын санхүүгийн дэмжлэгтэйгээр зохион байгуулж, монгол улсын эх, хүүхдийн эрүүл мэндийн олон тулгамдсан асуудлыг хөндөн хэлэлцэж, шийдвэрлэх арга замыг тодорхойлох юм.

Энэхүү чуулган нь 4 жил тутамд нэг болдог бөгөөд Эх Хүүхдийн Эрүүл Мэндийн Үндэсний Төв дээр 12 дугаар сарын 7-8-ны өдрүүдэд зохион байгуулагдаж, Монгол орны 21 аймаг, зарим сум, Улаанбаатар хотын бүх дүүргийн эмнэлэг, эрүүл мэндийн төвөөс ажил мэргэжлээрээ шалгарсан 120  эх баригч нар оролцож байна.