Нийслэлийн томоохон, зах худалдааны төвд үйлчилгээ эрхэлдэг худалдаачид “Худалдаачдын холбоо” байгуулах талаар болон өнөөгийн нөхцөл байдлын талаар мэдээлэл хийлээ.

Монголын эдийн засгийн хямрал худалдаа эрхлэгчдэд хүнд цохилт болжээ. Тодруулбал,140 гаруй худалдааны төв, захад 200 мянга гаруй худалдаачин наймаа эрхэлдэг. Тэдний 80 хувь нь банкинд зээлтэй, зээлийн дарамтанд орсон тухай худалдаа эрхлэгчдийн төлөөллүүд өнөөдөр хэвлэлийн бага хурал зарлалаа.

Иймд худалдаа эрхлэгчдийн эрх ашгийг хамгаалах зорилгоор Худалдаачдын холбоог байгуулаха ажлын хэсгийг байгуулсан гэдгийг энэ үеэр онцоллоо.  Энэ талаар “Наран туул” худалдааны төвийн бизнес эрхлэгч Б.Болор-Эрдэнэ “Наймаачид бид зээлийн дарамтад өдрөөс өдөрт гүн шигдэж, дааж давшгүй өрийн сүлжээнд орж, цаашид энэ тулгамдсан асуудлаа өөрсдийн хүчээр шийдвэрлэх аргагүй байдалд хүрээд байна.

Иймд өөрсдийн эрх ашгийг хамгаалах холбоог байгуулж Үндсэн хуулиар олгогдсон эрхээ хамгаалж, төр засагтаа дуу хоолойгоо хүргэж, худалдаа наймаа эрхэлдэг хүмүүсийн эрх ашгийг хамгаалахаар ажиллах болсноо зарлаж байна.

Одоо л худалдаачдад төрийн дэмжлэг хэрэгтэй байна. Нэг худалдаачны ард 4-5 хүн байгаа гэж бодохоор Монгол Улсын нэг сая иргэний ирээдүйн амьдрал бүрхэг байна. Бид 27 жилийн хугацаанд төрөөс ямар нэгэн дэмжлэг, тусламж хүсэхгүйгээр өөрсдийн хүчээр өдийг хүрсэн. Иргэн баян бол улс баян, худалдаачид баян бол иргэд баян” гэлээ.

Худалдаачдын холбоог байгуулахын тулд 20 гаруй захын 2000 худалдаачдаас судалгаа авсан байна. Судалгаанд хамрагдагсдын 83 хувь нь зээлтэй, 72 хувь нь эмэгтэйчүүд байгаа аж. Тэдний 29,2 хувь нь өрх толгойлсон эмэгтэйчүүд ажээ.