Зам, тээврийн хөгжлийн яамныхан өнөөдөр ээлжит шуурхайгаа хуралдуулж хэд хэдэн асуудлыг онцлон хэлэлцлээ.
Үүнд, сайд Д.Ганбат Гашуунсухайт боомтыг 24 цагийн үйл ажиллагаатай болгох ямар боломж байгаа талаар Өвөр Монголын тээврийн болон бусад албаны хүмүүстэй холбогдож ярилцах, Авто замын хяналтын пост байгуулах ЗЦГ-аас тавьсан асуудлыг судлан, зайлшгүй хийх шаардлага байгаа эсэхийг ЗЦГ-тай хамтран тодорхойлох үүрэг өгсөн.
Мөн “Экологи бус” компанийг салбарын хүрээнд бодлогоор дэмжиж, төлөвлөгөө гарган, шат дараатайгаар дэмжих шаардлагатайг шуурхай хурлын үеэр хэлсэн. Салбарын сайд Д.Ганбат өмнө нь тус компанийн үйл ажиллагаатай танилцаж, сайшаасан юм.
Түүнчлэн цахилгаан таксины үйлчилгээ явуулах гадаадын нисэх буудлуудын жишээг судлах, цахилгаан таксины загвартай танилцан саналаа өгөх, буруу талдаа хүрдтэй автомашиныг хязгаарлахыг татварын бодлогоор зохицуулах, бусад хүчин зүйлстэй уялдуулах асуудлыг судалж, тус компанийн зөв талдаа хүрдтэй болгох боломжтой саналыг судлан үзэхийг холбогдох газарт үүрэг болгов.
Шуурхай хуралдааны үеэр өнгөрсөн шуурхайгаас өгсөн үүрэг даалгаврын биелэлтүүдээ хэлэлцэж, тулгамдаад буй асуудлуудыг хэрхэн шийдвэрлэсэн талаар холбогдох газрын дарга нар болон харьяа байгууллагын дарга нар тайлагнажээ.
Түүнчлэн 2016-2020 онд шинээр барих авто замуудыг эдийн засгийн ач холбогдлоор нь эрэмбэлж, танилцуулах, Улаанбаатар-Дархан чиглэлийн авто замын шинэчлэлтийн ажлыг дотоодын аж ахуйн нэгжүүдээр, дотоодын бүтээгдэхүүн /бетон, арматур/ ашиглаж дотоодын үйлдвэрлэлийг дэмжих зорилгоор бетон хучилттай хийлгэх боломжтой талаар салбарын сайд онцоллоо.
