Баян-Өлгий аймгийн Засаг дарга асан С.Хавал аймгийнхаа Гаалийн газрын даргаар томилогдохоор нэр нь яригдаж эхэлжээ.

АТГ-аар шалгагдаж, шүүхийн байгууллагаар ял сонсож явсан түүнийг уг албан тушаалд томилж болохгүй хэд, хэдэн шалтгаан бий гэх. С.Хавал нь Баян-Өлгий аймгийн Засаг дарга, Засаг даргын орлогч, Гаалийн газрын дарга гэх мэт албан тушаалыг хашиж явсан нэгэн. Гэхдээ тэрбээр төрийн өндөр албан тушаалыг нэр төртэйгээр бус нилээн будлиантайгаар хашсан байдаг. Тодруулбал С.Хавал нь Баян-Өлгий аймгийн Засаг даргаар ажиллаж байхдаа нэгэн барилгын компанитай хуйвалдан барьсан байшингийх нь тоог нэмж бичиг,баримт бүрдүүлэн улсын комисст хүлээлгэн өгсөн нь хожмоо Мэргэжлийн хяналтын байгууллагын шалгалтаар илэрч, баларч байсан юм. Үүнээсээ болж тэрбээр төрийн албанд ажиллах эрхээ тодорхой хугацаагаар хасуулж дээрээс нь 3 жилийн хорих, хоёр жилийн тэнсэн харгалзах ял сонссон байдаг. Өөрөөр хэлбэл, Баян-Өлгий аймагт улсын төсвийн хөрөнгөөр 30 багийн төвийн байр барих барилгын төсөл хэрэгжүүлсэн “Нийслэл Өргөө” компаниас хахууль авсан хэрэгт унасан гэх. 

Авлига хээл хахуулийн хэргээр АТГ-т шалгагдан улмаар ял хүртэл сонсож явсан тэрбээр өнгөрсөн дөрвөн жил ажилгүй “гунхаж” явсан ч энэ удаа нам нь ялсан болохоор Гаалийн газраар даргаар дахин томилогдохоор “оодорч” буй сураг байна. Угтаа бол Төрийн албанд ажиллах эрхээ хасуулж цаашилбал авлигын хэргээр ял хүртэл сонсож явсан хүн Засгийн газрын томоохон агентлагийн даргаар ажиллах битгий хэл мэргэжилтнээр ч ажиллах эрхгүй гэсэн үг. Гэтэл МАН-ынханд хууль, шүүхийн шийдвэр нөлөөлдөггүй бололтой.  Мөн үүнээс гадна тэрбээр нийгмийн даатгалын хэрэгт  нэр нь холбогдож явсан удаатай. Энэ мэтчилэн нэр хүндээ алдаж ял хүртэл сонсож явсан С.Хавал бялуу хүртэх үү.