Сүхбаатар дүүргийн Цагдаагийн нэгдүгээр хэлтэс өнөөдөр "Талархалын баяр" хүндэтгэлийн арга хэмжээг зохион байгууллаа. Уг арга хэмжээний хүрээнд тус хэлтсийн Хэв журмын тасгаас цагдаагийн албан хаагчдынхаа гэр бүлийнхнийг хүлээн авч уулзаж, талархал илэрхийлэв.

Мөн 2016 онд хийж хэрэгжүүлсэн ажлын үр дүн болоод алба хаагчдын ажлын амжилтын талаар танилцуулсан. Энэ талаар Сүхбаатар дүүргийн Цагдаагийн нэгдүгээр хэлтсийн Хэв журмын тасгийн дарга Цагдаагийн дэд хурандаа Б.Ууганбаяр "Өргөсөн тангарагтаа үнэнчээ батлан ард иргэдийн амар тайван амьдралын төлөө гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах их үйлсэд чин шударгаар зүтгэж байгаа цагдаагийн алба хаагчийн ар гэрийн түшиг тулгуур, амжилт ололтын эхлэл нь болж байдаг цагдаагийн алба хаагчдынхаа гэр бүлийнхэнд талархал илэрхийлж энэхүү арга хэмжээг зохион байгуулж байна. Бид энэ онд амжилт бүтээлээр дүүрэн байлаа. Тухайлбал манай хамт олон нийслэлийн 14 цагдаагийн хэлстээс зөрчлийн илрүүлэлтээрээ нэгдүгээр байранд орлоо. Энэ бол алба хаагчдын төдийгүй тэдний ар талд байдаг та бүхний гавъяа зүтгэл юм шүү" хэмээсэн.

Харин "Талархалын баяр" хүндэтгэлийн арга хэмжээний талаар цагдаагийн алба хаагчдын ар гэрийнхэн "Энэхүү арга хэмжээг зохион байгуулан, алба хаагчдынхаа гэр бүлийнхэнтэй уулзаж, халуун дотно яриа өрнүүлсэн цагдаагийн хэлтсийн удирдлагуудад талархаж байна. Цагдаагийн албанд зүтгэж буй алба хаагчдын ар гэр байна, тэднийхээ ажлыг ойлгож, туслаж дэмжинэ гэдэг бол маш хариуцлагатай ажил байдаг. Тиймээс энэхүү хариуцлагатай албыг гүйцэтгэж, эднийхээ ажлыг ойлгож басхүү сэтгэл зүрхээрээ хамт зүтгэж байдаг бидэнд ийнхүү талархал илэрхийлж байгаа нь сайхан санагдаж байна. Энэхүү арга хэмжээ бидэнд маш их урам зориг, эрч хүчийг өглөө" гэцгээж байсан юм. 

Түүнчлэн энэ үеэр албаа нэр төртэй хааж буй тэргүүний алба хаагчдын ар гэрийнхэнийг шагнаж, урамшуулсан.

Б.Энхжин