Хуваарь ёсоор өнөөдөр намын бүлгүүд хуралдсан юм. Тэгвэл УИХ дахь МАН-ын бүлгийн дарга Д.Хаянхярваа сэтгүүлчдэд өнөөдрийн бүлгийн хуралдаанаар хэлэлцсэн асуудлуудын талаар мэдээлэл өглөө.

Сүүлийн үед УИХ, Байнгын хороодын ирц бүрдэхгүйгээс хуралдаан хойшлогдох, цагаасаа хоцорч эхлэх болсон. Энэ талаар эх баригч намын бүлгийн хуралдаанаар хэлэлцсэн байна. Бүлгийн дарга Д.Хаянхярваа “Цаашид гишүүдийн ирц, хариуцлагын асуудлаар нэгдсэн ойлголтод хүрсэн” гэлээ.

Бүлгийн хурлаар Сонгуулийн тухай хууль, Ард нийтийн санал асуулгын тухай хууль, Үндсэн хууль, Төрийн албаны тухай хууль, Засаг захиргаа нутаг дэвсгэрийн нэгж түүний удирдлагын тухай хуульд өөрчлөлт оруулах шаардлага байгаа эсэх асуудлаар саналаа солилцсон байна. Хуралдаанаас дээрх хуулиудад өөрчлөлт оруулах шаардлага байгаа эсэхийг судлах ажлын хэсэг байгуулахаар болжээ.

Мөн Туул голын сав газрыг тусгай хамгаалалтад авах тухай асуудлыг олонхийн бүлэг хөндөж ярьжээ. Ингээд Туул голын сав газартай холбоотой УИХ-ын тогтоол, шийдвэр болон цэвэрлэх байгууламжийн өнөөгийн байгаа нөхцөл байдалд хяналт тавьж ажиллах ажлын байгуулахаар болжээ. Ажлын хэсгийг УИХ-ын дарга М.Энхболд томилолтоос ирсэний дараа томилохоор болсон аж.