Шинэ жилийн баяр дөхсөн энэ өдрүүдэд халаасны хулгайн гэмт хэрэг нэмэгддэг. Энэ оны жилийн эцсийн байдлаар улсын хэмжээнд нийт 3472 халаасны хулгайн гэмт хэргийн шинжтэй гомдол, мэдээлэл бүртгэгдэж, үүнээс 551 гомдол, мэдээлэлд эрүүгийн хэрэг үүсгэн шалгасан байна.

Халаасны хулгайн гэмт хэргийн илрүүлэлт 2015 онд 48.4 хувьтай байсан бол 2016 онд 54 хувь болж 5.6 хувиар өсчээ.

Иймд уг хэргийг үйлдэж буй бүлэг зохион байгуулалттай этгээдүүдэд цохилт өгөх зорилгоор цагдаагийн байгууллагаас шинээр "Үнэгний ав" арга хэмжээг хэрэгжүүлжээ. "Үнэгний ав"-ыг өнгөрсөн есдүгээр сараас хэрэгжүүлж эхэлсэн бөгөөд энэ хугацаанд илрүүлсэн гэмт хэргийн талаар өнөөдөр мэдээлэл хийв.

Тус арга хэмжээний хүрээнд 19.872.000 төгрөгийн хохиролтой, 33 холбогдогчтой, 47 хэрэг, зөрчлийг илрүүлэн, хулгайд алдагдсан нийт 18 сая төгрөгийн үнэ бүхий 45 ширхэг гар утас, 850 мянган төгрөгийг хураан авч гэмт хэрэгт өртсөн иргэдийг хохиролгүй болгож ажилласан байна.

Тодруулбал, Нийслэлийн Баянгол, Сүхбаатар, Баянзүрх дүүргийн нутаг дэвсгэрт байрлах их, дээд сургуулиуд болон худалдааны төвүүдээр явж халаасны хулгайн гэмт хэрэг үйлддэг 15-25 насны Х, Д, А, Х, У, Г, Т нарын эмэгтэйчүүд нь бүлэглэн, зохион байгуулалттайгаар 22 удаагийн үйлдлээр иргэдийн гар утас, эд зүйлийг хулгайлсныг илрүүлэн шалгаж байгаа аж.

Мөн Сонгинохайрхан, Баянгол, Чингэлтэй, Баянзүрх, Хан-Уул дүүргийн нутаг дэвсгэрээр явж бусдын анхаарлыг сарниулан гар утсыг хулгайлдаг А, Б, Т, Б нарын 14-15 насны эрэгтэй хүүхдүүд нь орон гэрээсээ дайжин, халаасны хулгайн гэмт хэрэг үйлдэн, гэмт хэргийн замаар олсон мөнгөөрөө компьютер тоглоомын газруудаар хоноглон явдаг байсан нь тогтоогдсон. Дээрх сэжигтэн этгээдүүдийг дайчлан баривчлах үед амьдардаг түрээсийн байрнаас нь дөрвөн ширхэг гар утас гарч ирснийг нотлох баримтаар хураан авч, хохирогчийг эрэн сурвалжилж, олж тогтоосон байна.