Нийслэлийн үйлчилгээний нэгдсэн төвүүд болох Дүнжингарав, Драгон, Мишээл салбараас 20 нэр төрлийн архивын үйлчилгээ авах боломжтой болжээ. Тодруулбал, "Цахим архив" төслийн хүрээнд энэхүү ажлыг хэрэгжүүлж байгаа бөгөөд энэ талаар Нийслэлийн Архивын газраас өнөөдөр мэдээллээ.

Цахим гарын үсгийн тухай хуулийн дагуу баримт бичгийн урсгалыг цахим хэлбэрт шилжүүлэхээр "Албан хэрэг хөтлөлт, архивын үйл ажиллагаанд тоон технологи нэвтрүүлсэн нэгдсэн систем"-ийг нэвтрүүлжээ.

Энэхүү системийг нийслэлийн нутгийн захиргааны болон тэдгээрийн харьяа 873 байгууллагын 16,041 төрийн албан хаагч өдөр тутмын баримт бичиг боловсруулах, хянах, шилжүүлэх, батлах, илгээх, хадгалах, архивлах үйл ажиллагаанд хэрэглэж байгаа аж.

Нийслэлийн Архивын Газрын хэлтсийн дарга Д.Анхбаяр “Төрийн Архиваас үзүүлж байгаа лавлагаа үйлчилгээг цахим хэлбэрээр нийслэлийн үйлчилгээний нэгдсэн төвүүдээр дамжуулан хийх боломжтой боллоо. Мөн Төрийн Архивт төвлөрүүлэн хадгалж байгаа баримт болон бусад байгууллагууд өөрсдийн үйл ажиллагааны явцад бий болсон захирамжлалын баримт бичгүүдээ цахим мэдээллийн санд шилжүүлж, үүнээс улбаалан лавлагаа мэдээллийг нэг цэгээс өгөх боломжтой болж байна. Үүнээс нийт хандалтын 44%-ийг 1-59 минутын дотор буюу шуурхай байдлаар шийдвэрлэж, 35%-ийг ажлын найман цагийн дотор шийдвэрлэж байна" гэлээ.

2016 оны байдлаар иргэдийн авч байгаа архивын үйлчилгээний нийт хандалтын 35.8 хувь ажилласан жил тогтоохтой холбоотой хүсэлт ирсэн байна.

Иргэд, хуулийн этгээд дээр дурдагдсан гурван салбарын аль нэгэнд нь харьяалал харгалзахгүйгээр хүсэлтээ шийдвэрлэх боломжтой болсноос гадна онлайнаар хүсэлтээ ирүүлэх боломжтой бүрджээ.