Сурагчдын хичээл энэ пүрэв гарагт орох хуваарьтай байгаа. Харин Эрүүл мэндийн сайд А.Цогцэцэг Хотын дарга, Боловсрол, соёл, шинжлэх ухаан, спорт /БСШУС/ын сайд нарт нийслэлийн сурагчдын амралтыг сунгах хүсэлт гаргасан ч энэ асуудлыг хэрхэн шийдвэрлэх нь одоог хүртэл тодорхойгүй байна.

Өнгөрсөн долоо хоногт хотын даргын орлогч Ш.Анхмаа БСШУС-ын сайдтай уулзсан юм. Уулзалтын үеэр нийслэлийн ерөнхий боловсролын сургуулиудын сурагчдын амралтыг сунгах эсэх асуудлыг хэлэлцсэн. Томуу, томуу төст өвчний дэгдэлт их байгаа ч өнгөрсөн долоо хоногт Нийслэлийн эрүүл мэндийн газраас гаргасан судалгаагаар буурсан үзүүлэлттэй гарсан байна. Тиймээс ирэх долоо хоногт томуу, томуу төст өвчний өвчлөл буурсан тохиолдолд сурагчдын амралтыг сунгахгүй гэсэн юм. Уг асуудлыг шийдвэрлэх хугацааг  түр хойшлуулаад байсан юм. Тодруулбал, БСШУСЯ-наас Ерөнхий боловсролын сургуулийн сурагчдын өвлийн амралт энэ сарын 19-нийг хүртэл үргэлжлэх тул амралтын хугацааг сунгах асуудлыг түр хойшлуулах тухай мэдэгдээд байсан. Ханиад, томуугийн өвчлөл, халдварын тархалт цаг үеийн байдалтай уялдуулан сурагчдын амралт дуусахын өмнө холбогдох яамтай дахин зөвшилцөхөөр болсон. 

Тэгвэл энэ талаар БСШУС-ын яамнаас тодруулахад “Одоогоор сурагчдын амралтын асуудлаар албан ёсны шийдвэр гараагүй байна. Яамны зүгээс сурагчдын амралтыг сунгахгүй гэсэн байр суурьтай байгаа. Гэхдээ албан ёсоор шийдвэрээ гаргаагүй байна” гэв.

Харин эцэг эхчүүдийн зүгээс сурагчдын амралтын хугацааг сунгах хүсэлтэй байна. Тэд нийслэлийн эрүүл мэндийн газрын гаргасан судалгаагаар  ханиад томуугийн өвчлөл буурсан гэж байгаа ч эмнэлэгт очиж чадаагүй маш олон хүүхэд ханиад хүрч, гэрээрээ эмчлүүлж байна. Мөн сурагчдын амралт таарсан учир өвчлөл бага байгаа ч хичээл эхлэхээр дэгдэх магадлалтай гэж үзэж байгаа аж. Тиймээс хүйтэн сэрүүн, утааны улиралд хүүхдүүд амрааж, урин дулаан болохоор хичээлийг нь нөхөж орж болно хэмээн эцэг эхчүүд үзэж байна гэдгээ цахим ертөнцөөр дамжуулан илэрхийлсээр байна. 

Б.Энхжин