МЧБХ-ны одоогийн явуулж буй үйл ажиллагааг хууль бус хэмээн үзэж буй дасгалжуулагч Б.Баяраа, Ц.Хосбаяр, тамирчин Ц.Цогтбаяр, Г.Мандахнаран тэргүүтэй 40 гаруй тамирчин хуралдаж, Түр хороо байгуулсан талаар бид мэдээлсэн. Тэгвэл тэд өнөөдөр өөрчлөн шинэчлэх Их хурал хуралдуулах талаар шаардлага хүргүүлж байгаагаа олон нийтэд мэдээллээ.

Энэ талаар түр хорооны дарга МУГТ О.Пүрэвбаатар "Монголын чөлөөт бөхийн холбооны хамгийн сүүлийн албан ёсны Ерөнхийлөгч нь 2009 оны гуравдугаар сарын 14-ний Их хурлаар 180 төлөөлөгчийн санал хураалтаар сонгогдсон Л.Чинбат бөгөөд энэ хүний болон энэ үед байгуулагдсан удирдах зөвлөлийн эрх хэмжээ нь 2012 оны Лондонгийн олимпийн дараагаар дуусгавар болсон. Үүнээс  хойш энэ холбоо нь албан ёсны хурлаа хийлгүй, нэр бүхий хүмүүс дүрэм журмаа зөрчин, бусдын гарын үсгийг хуурамчаар зуран, хуурамч бичиг баримт үйлдэх, тамга тэмдэг нөхөн дарж улсын бүртгэлд бүртгүүлэх зэрэг гэмт хэргийн шинжтэй үйлдлүүдийг удаа дараа хийсээр өнөөг хүрсэн. Тиймээс одоогийн удирдлага гээд байгаа хүмүүсийг шийдвэр гаргах эрхгүй, эрх зүйн чадамжгүй гэж үзэн энэ цаг мөчөөс эхлэн МЧБХ нэрийн өмнөөс нэр бүхий хүмүүсийн урд өмнө гаргасан болон гаргах ямар нэгэн тогтоол, шийдвэр, сонгон шалгаруулалтыг хүчин төгөлдөр хэмээн үзэхгүй гэдгийг албан ёсоор мэдэгдэж байна” гэв.

Харин түр хорооноос энэхүү шаардлагатай холбоотойгоор Монголын Үндэсний Олимпийн хороонд дараахь хүсэлтүүдийг тавьж байгаа аж. Үүнд:

1. МЧБХ 2017 оны 1 сарын 22-ны өдрөөс эхлэн албан ёсны бүх үйл ажиллагаа зогсох

2.МЧБХ-ны үйл ажиллагааны тасралтгүй байдлыг хангах үүднээс МҮОХ-нд энэ ажлыг Их хурлаас албан ёсны удирдлага сонгогдтол түр хариуцах хүсэлтийг тавьж байна.

3.МЧБХ-ны өнөөгийн удирдлага тамга тэмдгээ 2017 оны 02 дугаар сарын 02-ны дотор Үндэсний Олимпийн хороонд хадгалуулах

4.МЧБХ-нд ЕНБД холбооны байрыг 2017 оны 02 дугаар сарын 02-ны дотор чөлөөлж өгөх

5.Үндэсний олимпийн хороонд бүх эд хогшил, эд хөрөнгийг хүлээлгэж өгөхийг шаардав.