ШУА-ын Палеонтологи, геологийн хүрээлэн, “Нүүдэлчдийн өв соёл” ТББ, “Говийн оюу” хөгжлийг дэмжих сан хамтран Шар цавын үлэг гүрвэлийн мөрийг хамгаалах, аялал жуулчлалын шинэ бүтээгдэхүүн болгох санаачилга гаргасан юм.

Шинжлэх ухаан, аялал жуулчлалын салбарын судлаачдаас бүрдсэн “Үлэг гүрвэлийн мөрөөс цайны зам хүртэлх” төслийн багийнхан дээрх санаачилгыг хэрэгжүүлж, Шар цавд тэмдэглэгдсэн үлэг гүрвэлийн мөртэй хэсгийг хамгаалалтад авч, аялагч сонирхогч, судлаачдад зориулан зам тавьжээ. Мөн хамгаалалтын байгууламж барихаар ажиллаж байгаа гэнэ.

Өмнөговь аймгийн есөн гайхамшгийн нэг, 70 сая орчим жилийн тэртээх үлэг гүрвэлийн зам, мөр бүхий палеонтологийн дурсгалтай эл газрыг тохижуулж, олон улсын жишгээр хамгаалснаар жуулчдын урсгалыг говь руу чиглүүлэх боломж нээгдэнэ хэмээн орон нутгийн иргэд үзэж байна.