Монголын Үйлдвэрчний Эвлэлийн Холбооноос шатахууны үнэ нэмсэнтэй холбогдуулж өнөөдөр мэдээлэл хийлээ.

Тэрбээр Петровис, Шунхлай зэрэг нь компаниуд шатахууны үнийг 50-100 төгрөгөөр нэмсэн. Үүний улмаас үнийн тогтворгүй байдал үүсч болзошгүй тул МҮЭХ-оос шүүмжлэлтэй хандаж хэд хэдэн  арга хэмжээг авахыг шаардлаа.

Үүнд:

• Үнэ нэмсэн шалтгаанаа тодорхой тайлбарлаж, хууль зөрчсөн тохиолдолд Өрсөлдөөний тухай хуулийн дагуу компанийн эздээс хэрэглэгчдэд учруулсан хохирлыг нь гаргуулах,

• Цаашид шатахууны үнийг тогтвортой байлгах чиглэлээр үзүүлж буй татварын хөнгөлөлтийн үр дүн, борлуулалтыг оновчтой болгох,

• Үнийн зохистой түвшин буюу хуучин үнээр хэрэглэгчдэд хүргэх зэрэг шаардлагыг тавив. 

Хэвлэлийн хурлын үеэр МҮЭ-үүдийн холбооны ерөнхийлөгч Х.Амгаланбаатар "Үнийг нэмэхдээ зөвшөөрлөө Ашигт малтмалын газар, Уул уурхайн яам болон үнэ тогтоох тодорхой зөвлөлтэй ярилцсаны дараа авах ёстой. Харамсалтай нь нэр бүхий компаниуд ажлын бус цагаар буюу өнгөрсөн баасан гаригийн орой ямар нэгэн урьдчилсан санал хүргүүлэхгүйгээр үнээ нэмсэн нь Өрсөлдөөний тухай хуулийг зөрчиж байна. Энэ удаагийн шатахууны үнийн өсөлтөд бодит шалтгаан алга. Хэрэв шатахууны үнийг бууруулж хуучин үнэд аваачихгүй бол тухайн ААН-ийн шатахууныг худалдан авахгүй байхыг иргэдэд уриална” хэмээв. 

Энэ шаардлагыг Монгол улсын Засгийн газар, Ерөнхий сайдад  хүргүүлнэ. Хэрэв тодорхой арга хэмжээ авахгүй бол ШӨХТГ-т хандана гэж  МҮЭХ-оос мэдэгдлээ.