Үндэсний их баяр наадам хийгээд Ардын хувьсгалын 91 жилийн ойг тохиолдуулан Монгол Улсын Ерөнхийлөгч Ц.Элбэгдорж зарлиг гарган энэ сарын 10-нд боловсрол, соёл урлаг, спорт, төр захиргаа, аж үйлдвэр, зам тээвэр, хууль эрх зүй, хэвлэл мэдээлэл, мал аж ахуйн салбарт олон жил үр бутээлтэй ажилласан зарим хүнд Монгол Улсын гавьяат цол, төрийн одон, медаль хүртээсэн билээ. Тэдний нэг нь “Prosounds” дуу бичлэгийн студийн захирал, дуучин Жарантайн Алтанцэцэг юм.

  Монголын рок попын ертөнцөд өөрийн гэсэн өнгө төрх, байр суурийг бий болгон фэнүүдийнхээ хүрээг тэлж яваа дуучин маань урлагт 20 гаруй жил зүтгэж буй нэгэн. Цомог, тоглолтоороо үргэлж сюрприз барьдаг тэрбээр дуу бичлэгийн студиэс гадна “Making the Band-ll” шоу нэвтрүүлгийн төсөлд продюссерээр оролцож “Extacy" нэртэй охидын хамтлагтай болсон. Үүгээр ч зогсохгүй, охид эмэгтэйчүүдэд зориулсан гоёлын хувцасны тасаг хүртэл нээсэн.

   Удахгүй хүүхдийн сувилал байгуулахаар зорьж яваа дайчин, хөдөлмөрч бүсгүй гэдэгтэй хэн ч маргахгүй биз ээ. Ингээд түүнтэй ярилцсанаа толилуулъя.

-Гавьяат цолоор энгэрээ мялаасанд тань баяр хүргэе. Нэгэнтээ та “Гавьяа шагналын төлөө бус уран бүтээлийнхээ талбарт шаргуу хөдөлмөрлөж явна” гэж хэлсэн удаатай. Мэдээж хэрэг, энэ шагналыг аваасай гэж олон хүн хүсч байсан нь нууц биш байх?

-Маш их баярлалаа. Би долдугаар сарын 9-нд Налайхын уурхай байгуулагдсаны 90 жилийн ойн баярт зориулсан хүндэтгэлийн концертод оролцох гээд явж байсан юм. Тэгтэл энэ баяртай мэдээг дуулаад сэтгэл минь их догдолсон шүү. Аав минь уурхайчин хүн байсан. Би ч гэсэн Налайх дүүрэгт өсч торнисон болохоор энэ газартаа их хайртай. Магадгүй намайг аавын минь буян заяа, Налайхын маань уул, ус түшсэн байх. Төрийн одон медалиар энгэрээ мялаах баярт мэдээг Налайх руу явах замдаа мэдсэн болохоор бүр ч их бэлэгшээсэн. Тэгээд баярын концертын тайзан дээр гараад бараг дуулж чадахгүй шахам баярлаж догдолсон, цээжин дотор нэг юм огшоод байж билээ. Юутай ч, би дуугаа дуулчихаад энэ баярт мэдээгээ хамгийн түрүүнд гэр бүлийнхэндээ дуулгах гэж яарч байлаа. Маргааш нь Налайхаас ирээд шагналаа гардсан даа.

-Таны хувьд бас битүүхэндээ хүлээж байсан болов уу гэж боддог?

-Би урлагийн салбарт 20 гаруй жил зүтгэж явна. Монголын соёл урлагийн салбарт өөрийн гэсэн хувь нэмрийг оруулж, шинэ залуу уран бүтээлчдийг дэмжих зорилгоор “Prosounds”cтудиэ байгуулаад өдгөө гурав дахь жилийнхээ нүүрийг үзэж байна. Мөн эх орныхоо нэрийг олон улсын тавцанд гаргаж, гадаад дотоодын томоохон фестивальд амжилттай оролцож байсан. Монгол Улсынхаа соёл урлагийн салбарыг уран бүтээлээрээ дамжуулан дэлхийд таниулж дөрвөн ч удаа Гран при шагналыг авсан шүү дээ. Түүнээс гадна олон төрлийн уралдаан тэмцээнээс хүртсэн шагнал зөндөө бий. 2009 онд студийн маань нээлтэд Дэлхийн урлагийн холбооны төлөөлөгчид ирж оролцсон. Энэ үеэр надад тус холбооны “Мастер уран бүтээлч” гэсэн цолыг өгч байгаагаа мэдэгдсэн. Энэ шагналыг уран бүтээлчийн хувьд дуулж хуурдахаас гадна урлаг соёлын салбарт тодорхой хэмжээний хувь нэмэр, хөрөнгө оруулалт хийж чадсан хүнд өгдөг учиртай юм билээ. Тэгэхээр дээр дурдсан гурван зүйлийг минь үнэлсэн, бас уран бүтээлийн их замд минь урам хайрлаж энэ том шагналыг надад гардуулсан болов уу. Гавьяа шагналыг дагаад их итгэл найдвар, өндөр үүрэг хариуцлага ирдэг юм байна. Цаашид маш олон зүйлийг хийнэ ээ. Уран бүтээл, хүмүүнлэгийн ажил, бизнес гээд би ер нь олон талын ажилд идэвхтэй оролцдог, амьдралд их нийтлэг ханддаг хүн юм уу даа. Мэргэжлийн уран бүтээлч хүний хувьд, хийж бүтээсэн бүхнээ эргээд харахад ийм гавьяа шагнал авах эрхтэй гэж өөрийгөө бодож явсан минь үнэн.

-Шинэ цомог, тоглолтоос гадна охидын хамтлагтаа хүртэл анхаарал тавиад таны амьдрал тэр чигээрээ уран бүтээл болчихдог юм шиг ээ?

-Тийм шүү /инээв/. “Mak­ing the Band-il” шоуны төсөл маш амжилттай хэрэгжсэн. Одоо охидын хамтлаг маань уран бүтээлээ хийгээд сайхан явж байгаа. Миний хувьд, уран бүтээлээ тасралтгүй үргэлжлүүлсээр өдийг хүрлээ. Мэдээж хэрэг, өнгөрсөн хугацаанд саад бэрхшээл тулгарсан ч би цаг ямагт идэвхтэй, дайчин амьдарсан. Поп дууны цомгууд маань аль хэдийн үзэгч, сонсогчдын хүртээл болсон. Араас нь ардын дууны, хүүхдийн дууны цомог гаргалаа. Тун удахгүй пoп опера дуунуудаар цомог гаргана. Ирэх аравдугаар сард гурав дахь бие даасан тоглолтоо хийх гээд бэлтгэл ажилдаа орчихсон явж байна. Энэ мэтээр миний амьдрал тэр чигтээ л уран бүтээл болчихдог нь үнэн юм.

-Цол авмагц хүмүүс мялаалга, найраа хэдийд хийх вэ гээд асуугаад эхэлчихсэн байх?

-Тэгдэг юм байна лээ. Одоохондоо энэ талаар ярьж, төлөвлөсөн юм алга. Бусад хүмүүс цолоо аваад л найр наадам хэдийд хийх тухайгаа яриад төлөвлөчихдөг гэсэн. Би жижиг зүйлд ч гэсэн ач холбогдол өгч, анхаарал хандуулах дуртай. Тэгэхээр ийм том гавьяа шагнал авчихаад яаж зүгээр суухав. Рок попын уран бүтээлчид, найз нөхөд, гэр бүлийнхэнтэйгээ хамт баяраа хуваалцана даа.

-Энгэрийг нь мялаасан дээлээ хэдийд зэхсэн бол. Эсвэл таны гоёлын шүүгээнд байсан юм уу?

-Миний гоёлыг урлаж, олон жил хамтарч ажилласан Халиунаа гэж үйлчин бүсгүй бий. Шагнал авах гэж байгааг минь дуулаад ердөө л ганцхан хоногийн дотор үндэсний загвартай шар торгон даашинз урлаж өгсөн шүү. Хормой нь их гоё, харин энгэр нь битүү юм билээ. Угаасаа шагнал авахад битүү энгэртэй дээл өмсөх ёстой юм гэсэн.

-Та авсан шагнал, өргөмжлөл, цом, тэмдэг болон цомог, DVD-гээ студийнхээ өрөөнд байрлуулдаг юм билээ. Энэ шагналаа ч мөн тэнд залах уу?

-Одоогоор гэртээ хадгалж байгаа. Шагнал авч байгаа зураг маань бэлэн болохоор гоё жаазанд хийнэ. Тэгээд цол тэмдэгтэйгээ цуг “Prosounds” студид байгаа өөрийнхөө өрөөнд аваачна даа. Би өнгөрсөн жил урлагийн бурхан Янжинлхамыг өрөөндөө залсан. Энэ шагналыг бурхныхаа өмнө зална гэж бодож байгаа шүү.