Өмнөд Солонгос улсын Кёнгбук аймгийн цагдаагийн газар монгол залууг, солонгос иргэний амь насыг хөнөөсөн хэрэгт холбогдуулан саатуулжээ. Монгол залуу С энэ жил 26 настай, тус улсад хөдөлмөрийн гэрээгээр ажиллаж байсан байна. Энэ сарын 10-ны өдрийн оройн 21.30 минутийн орчим монголын иргэн С нь хамт ажилладаг Солонгос улсын иргэн, 62 настай Ким-тэй муудалцаж, улмаар үйлдвэрээс хамт гарч явахыг гэрчүүд харсан байна. Ингээд тэр хоёрыг гэрчүүд хайж эхэлсэн бөгөөд Солонгос иргэний гар утсыг олсон даруй цагдаад дуудлага өгчээ. Улмаар цагдаагийнхан цаг алдалгүй ирж үйлдвэрийн эргэн тойронд эрэл хийснээр Солонгос иргэн хүйтэн мэсний улмаас амь насаа алдсан байхыг олж, монгол залуу холгүй ууланд бүгж байхад нь баривчилсан байна.