Өнгөрсөн оны зургаадугаар сард “Ийгл” телевизийн сэтгүүлч Т.Алтаншагай, “Иргэдийн шударга шүүх” ТББ-ын тэргүүн Х.Бат-Ялалт мэдээлэл хийж УИХ-ын гишүүн асан Л.Эрдэнэчимэгийн Төрийн ордон дотор халамцуугаар ёс бус үг хэлж, авирлаж байсан 26 секундын бичлэгийг олон нийтэд дэлгэсэн билээ. 

Харин тус бичлэгийг хийсэн гэх УИХ-ын гишүүн  асан Г.Уянга утсаа хулгайд алдсан гэсэн тайлбарыг тухайн үед хэлсэн байдаг. 

 Хэсэгтээ шуугиан болж "200 саяар хүртэл үнэлэгдсэн" гэх тус бичлэгийн үнэн мөн өнөөдрийг хүртэл тайлагдаагүй ирсэн. Тэгвэл найман сарын дараа тус бичлэгийн талаар УИХ-ын гишүүн асан, ТТЭНН-ын дарга Г.Уянга  "ТВ9" телевизийн "Айлын хоол амттай " нэвтрүүлэгт оролцох үеэрээ шүүхэд хандахаа мэдэгдсэн. Тэгвэл , “Иргэдийн шударга шүүх” ТББ-ын тэргүүн Х.Бат-Ялалт өнөөдөр түүнд нээлттэй захидал илгээсэн байна. Тэрбээр “Сайн сууж байна уу? Таны ажил амьдрал тавлаг сууна уу? Сэтгүүлч Биндэръятай хийсэн энэхүү ярилцлагыг тань үзээд, мөн энд тэнд элдэв зүйл яриад явааг чинь сонсоод энэхүү ил захидлыг бичиж сууна.

Бид чинь залуу хүмүүс. Бас ч үгүй нийгмийг эрүүлжүүлэхийн төлөө тэмцдэг хүмүүс. Намайг их л олон удаа доромжиллоо. Зүгээрээ тэр байтугай доромжлуулдаг. Ёстой нэг доромжлох тусам нь долоон бурхан од шиг гялалзах итгэл үнэмшил, үзэл санаатай учраас тэр асуудал биш. Намайг таньдаггүй л гэнэ. Миний утсыг хулгайлсан л гэнэ. Тэр бичлэгийг худалдсан л гэнэ. Юу ч гэж хэлж байсан тэр чинь баримт нотолгоотой байх ёстой. Эс бөгөөс тэр бүхэн гүтгэлэг болно.

Би нэг зүйлийг маш их гайхаж байгаа. Тийм бичлэг хийгдэх нөхцөл бүрдээд тэр дунд нь ангалзаад сууж байсан чинь, бүр тэр бичлэгийг нь хийгээд урамшуулаад сууж байсан чинь надад үнэхээр таалагдаагүй. Би журмын анд Г.Уянга маань тийм зүйл хийгээд байж байна ч гэж төсөөлөөгүй. Дуу хоолойг нь ч таниагүй. Тэр бичлэгийг манай Иргэдийн Шударга Шүүх ТББ-ын УЗ-ийн гишүүд бүгд хамтдаа үзээд олон нийтэд хүргэх хэрэгтэй гэж л шийдсэнээс сонгуульд яаж нөлөөлөх бол яах бол гэж бид огт бодоогүй. УИХ-д иймэрхүү ёс бус, хууль бус зүйл байж болохгүй гэдэгт л итгэж байсан. Гэтэл УИХ-ын гишүүн асан Эрдэнчимэг Уянга яагаад ингэж байгаа юм болоо гээд л хараагаад, энэ Уянгын хийсэн бичлэг гэхээр нь манай журмын нөхөр УИХ дах бузар муу, муухай бүхнийг илчилж байгаа юм байна даа гэж өөрийг чинь өмөөрөх сэтгэл хүртэл төрж байсныг хэлээд ч юу гэхэв...

Гэтэл... Харамсалтай нь өнгөрсөн хугацаанд хэн энэ бичлэгийг яах гэж тараав гэж л хардсан, өширхсөн сэтгэлгээгээр асуудалд хандаад яриад байхаас төрийн ордонд хууль бус үйл явдлууд өрнөдөг, түүнийг таслан зогсоох ёстой эсэх талаар нэг ч үг хэлэхгүй юм.

Шүүхдээ өг л дөө. Хүмүүсээс зөвлөгөө авсан чинь шүүхэд өг гэсэн. Тэгээд Алтаншагай, Бат-Ялалт 2-ыг шүүхэд өгнө гэж ярихыг сонслоо. Өг өг. Яг яаж, ямар эрх ашиг чинь хөндөгдөж, яаж хохирсноо нэхэмжлэл дээрээ тодорхой бичих ёстой юм шүү.

Утсаар ярихдаа нэг өөр юм ярина. Сэтгүүлчдэд ярилцлага өгөхөөрөө нэг өөрөөр ярина. Үг, үйлдэл 2 зөрөхгүй байх нь үнэн сэтгэлийн үзүүр байх байхдаа.

Бид өнөөдөр ийм ялих, шалихгүй асуудлаар зөвхөн өөрийнхөө нэр, төр алдар хүндийг хөөцөлдөж явахаас илүү чухал ажлууд баймаар сан.

Төрийн ордон ариун дагшин байх ёстой. Түмэн олныхоо итгэлийг дааж, хууль дүрмээ ягштал дээдлэн мөрддөг байх нь улс төрч, нийгмийн зүтгэлтнүүдийн ухамсар хариуцлага байх ёстой.

Цаг алдалгүй ухаарч цаашдаа түмэн олныхоо төлөө 2-гүй сэтгэлээр үнэнч, шударгаар өөрийгөө золиослон тэмцэх үйл хэрэг чинь гэгээн байх болтугай. Хүндэтгэсэн Х.Бат-Ялалт” гэсэн байна.