Далай ламын Монголд хийсэн айлчлалтай холбоотойгоор БНХАУ манай улстай хийх бүх яриа хэлэлцээгээ зогсоогоод байсан билээ.

Харин одооноос тус улс байр сууриа өөрчилж эхэллээ. Үүний нэг илэрхийлэл нь БНХАУ-ын Гадаад хэргийн сайд Ван И Гадаад харилцааны сайд Ц.Мөнх-Оргилыг айлчлал хийхийг урьсан явдал юм. Түүний айлчлал өнөөдөр эхэлж байгаа бөгөөд хоёр өдөр үргэлжилнэ.

Мөн БНХАУ-ын Ардын банк Монголбанктай байгуулсан своп хэлэлцээрээ үргэлжлүүлэх тухай яриа хэлэлцээ хийх урилга ирүүлжээ. Тус хоёр банкны хооронд байгуулсан хоёр тэрбум юанийн своп хэлэлцээрийн гэрээ ирэх наймдугаар сард дуусч байгаа юм. Монголд болсон АСЕМ-ийн уулзалтын үеэр БНХАУ-ын Ерөнхий сайд Ли Көцян “Своп хэлэлцээрийн хугацааг цаашдаа сунгана. Ингэхдээ хэмжээг нь 10 тэрбум юаниар нэмэгдүүлэх боломжтой” гэсэн байр суурийг Ерөнхий сайд Ж.Эрдэнэбаттай уулзах үеэрээ илэрхийлжээ. Тиймээс Монголбанк своп хэлэлцээрийн гэрээг гурван жилээр сунгаж, хэмжээг нь 10 тэрбум юаньд хүргэх саналаа БНХАУ-ын талд илэрхийлэхээр төлөвлөсөн байна. Ойрын хугацаанд энэхүү яриа хэлэлцээг эхлүүлнэ гэдгийг Монголбанкны ерөнхийлөгч Н.Баяртсайхан онцоллоо.