“Петрочайна Дачин Тамсаг” ХХК-ийн XIX талбайгаас газрын тос тээвэрлэж явсан автомашинд мах, согтууруулах ундаа нууж Бичигт боомтоор нэвтрүүлэхийг завдсан зөрчлийг тус боомтын экспорт, импорт, Хилийн хорио цээрийн хяналтын хэлтсийн улсын байцаагчид илрүүлжээ.
Тодруулбал, газрын тос тээвэрлэх үйл ажиллагаа эрхэлдэг компанийн жолооч нар энэ оны нэгдүгээр сарын 22-ны өдөр North Benz маркийн цистерн бүхий тээврийн хэрэгслийг нуувч болгон ашиглаж 72 литр дарс, 259.8 кг үхэр, хонины мах, мөн иргэн Э нь “Галлопер” маркийн суудлын авто машины запас дугуй, суудлын дор 119.7 кг хонины махыг нууж, хууль бусаар БНХАУ руу экспортлохыг завдсан зөрчил гаргасан байна. Эдгээр үйлдлийг илрүүлэн хууль тогтоомжийн дагуу холбогдох арга хэмжээг авч шийдвэрлэсэн байна.
Иргэд, аж ахуйн нэгжүүд нь мал, амьтны гаралтай түүхий эд, бүтээгдэхүүнийг хууль бусаар экспортлохыг завдах зөрчлөөс урьдчилан сэргийлэх хяналт шалгалтыг хийж, зөрчлийг давтан гаргахгүй байх талаар зөвлөмж өгч, уг хяналтыг эрчимжүүлэн ажиллаж байгаа аж.