Сүхбаатар аймгийн Халзан сумын хоёр дугаар багийн малчин Рагчаагийн Ооёо Монгол Улсын аварга малчин болж, шагналаа малынхаа хотонд, ах дүү, үр хүүхдүүдийнхээ хамтаар хүндэтгэлтэйгээр гардан авлаа. Түүний дүү Р. Энх-Амгалан 2012 онд, Р. Мөнхтөр 2016 онд  мөн Улсын аварга малчид болж байсан бөгөөд ийнхүү нэг айлын гурван хүү Улсын аварга малчид боллоо. Энэ нь Сүхбаатар аймагт тохиож буй анхны үйл явдал юм.

Р.Ооёо нь гурван хүүтэй айлын хамгийн том нь. 1970 оноос хойш өнөөг хүртэл тасралтгүй 47 жил мал маллаж ирсэн бөгөөд өвөг дээдсээс уламжилж ирсэн мал маллах арга ухаанаа тав дахь үедээ өвлүүлж яваа малчин юм. 2002 онд Сумын сайн малчин, 2011 онд Аймгийн сайн малчин болсон. Тэрээр мал маллах хугацаандаа өвөг дээдсийнхээ мал маллах арга туршлагыг амьдрал ажилдаа хэрэгжүүлж, малынхаа ашиг шим, үүлдэр угсааг сайжруулах, отор нүүдлийг байнга хийх, нийгмийн хариуцлагаа ухамсарлан сум, аймаг орон нутгийнхаа бүтээн байгуулалт, хөгжил цэцэглэлтэнд өөрийн хувь нэмрээ оруулж хандив өргөх, хүмүүнлэгийн үйлсэд нэгдэх, цөөн малтай иргэдийг малжуулах зэргээр олон ажлыг хийж иржээ.

н.Рагчаагийн гурван хүү гурвуулаа сайн малчнаас гадна сайн уяачид. Хоёр дүү нь аймгийн алдарт уяач цолтой бол, Р.Ооёо өөрөө Монгол Улсын алдарт уяач цолыг 2013 онд хүртэж, 2017 онд Улсын аварга малчин болсоноор Улсын хошой цолтон болж байна.

Улсын аварга малчдын шагналыг УИХ-ын гишүүн Ч.Улаан, Монгол Улсын шадар сайдын зөвлөх  Х.Гэрэлт-Од, Авто тээврийн үндэсний төвийн дэд дарга Ж.Эрдэнэбаатар, аймгийн засаг дарга З.Энхтөр, аймгийн ИТХ-ын дарга Б.Гансүх, аймгийн Хүнс, хөдөө аж ахуйн газрын дарга Э. Өлзийтогтох нар гардууллаа.