Төрүүлсэн үрээ эзэнгүй айлын хашаанд булсан хэрэг гарчээ. Тодруулбал Баянзүрх дүүргийн 21-р хороо “Ганц худаг” руу явах замд эзэнгүй айлын хашаанд найман сартай хүүхэд булсан байна гэх мэдээлэл цагдаагийн байгууллагад иржээ. Дуудлагын дагуу тус дүүргийн цагдаагийн болон онцгой байдлын алба хаагчид хэргийн газарт хоёр хоног ажилласны эцэст хүүхдийн цогцсыг гаргаж авсан байна.

Энэ хэрэгт нярайн ээж гэх эмэгтэйг шалгаж эхэлжээ. 30 орчим настай, эрхэлсэн тодорхой ажилгүй түүнийг мөрдөн шалгалтын явцад биеэ үнэлж амьдардаг байсныг тогтоожээ. Одоогоор энэхүү хэргийн мөрдөн шалгалт үргэлжилж, нярайн нас барсан шалтгааныг тогтоохоор холбогдох албаныхан ажиллаж буй юм байна.

Найман сартай хүүг хэн нэгний буруутай үйлдлийн улмаас амь насаа алдсан байж болзошгүй нөхцөл байдал тогтоогдож, нярайг амьсгал хураасны дараа хэргээ нуух зорилгоор булсан байж магадгүй хэмээн шалгаж эхэлсэн байна. Нярайн ээжид Эрүүгийн хуулийн 91-р зүйл 5.16-д зааснаар хохирогчийг биеэ хамгаалж чадахгүйг мэдсээр байж амь насыг нь санаатайгаар хохироосон болон үйлдсэн гэмт хэргээ нуун дарагдуулсан гэх үндэслэлээр шалгаж байна.