Москвагийн цагдаагийн газраас тус улс дахь Монголын Консулын мэдлийн байранд нууцаар хууль бус мөрийтэй тоглоом, казино ажиллуулж байсныг илрүүлж эрүү үүсгэсэн тухай Asiarussia.ru мэдээлсэн.

Тэгвэл энэ талаар Гадаад хэргийн яамнаас мэдээлэл хийлээ. ГХЯ-ны ТНБД Д.Даваасүрэн “Монголын консулын байранд казино байгуулсан зүйл байхгүй. Казино байгуулсан гээд байгаа байрыг 2007 оноос хойш ОХУ-ын Центр Ригон гэдэг компани түрээслэж байгаа. Уг байрыг Москва хотын захиргаа, Мэргэжлийн байгууллагуудын зүгээс ашиглах боломжгүй гэсэн. Тиймээс уг компани засч янзлаад түрээслэсэн. Гадаад харилцааны сайд Ц.Мөнх-Оргил гарч байгаа мэдээллүүдийг үнэн бодитой эсэхийг шалгуулахаар ОХУ-д суугаа Элчин сайд Дэлгэрмаа болон Элчин сайдын яамны ажилтнуудад үүрэг чиглэл өгсөн.

Энэ дагуу Элчин сайдын яамны ажилтнууд Центр Ригон компаний түрээслэж байгаа байранд шалгалт хийсэн байна. Шалгалтаар казино байгуулсан зүйл илрээгүй. Харин түрээслэж байгаа компаний зүгээс  “Бид казино байгуулсан зүйл байхгүй. Ташаа мэдээлэл байна” гэх тайлбарыг өгсөн байна лээ. Гэхдээ бид нягтлан тодруулах шаардлагатай гэсэн чиглэлээ өгсөн байгаа. Одоогийн байдлаар сайтуудаар гарсан мэдээллийг бодит бус, хууль эрх зүйн үүднээс нотлогдоогүй байна гэж үзэх үндэслэлтэй. ОХУ-ын цагдаагийн газар асуудлыг шалгаж, шалгалтын хариугаа манай талд албан ёсоор өгөх ёстой. Одоогоор хариу ирээгүй байна” гэсэн мэдээллийг өгөв.

Тэрбээр мэдээллийнхээ дараа сэтгүүлчдийн сонирхсон асуултад хариуллаа.

-Түрээслэж байгаа компани нь тэнд ямар үйл ажиллагаа явуулж байсан бэ?

-Түрээслэж байгаа компаниуд нь хаалгаа цоожилсон байна лээ. Уг нь цагдаагийн байгууллагаас хаалга үүдийг цоожиж лазадсан байх ёстой. Гэхдээ битүүмжилсэн лазадсан зүйл байгаагүй.

-Нийтдээ хэдэн мкв байр байсан юм бол?

-1300 гаруй мкв байр.

-Нийт хэчнээн газар түрээслэж байсан юм бол?

-10 гаруй компани түрээслэх хүсэлтээ өгч байснаас Ценрт Ригон компани шалгарч байсан юм байна лээ. Түрээсийн хугацаа нь энэ оны есдүгээр сард дуусна.