Чингэлтэй дүүрэг дэх цагдаагийн нэгдүгээр хэлтсийн алба хаагчид хулгайн гэмт хэргийг үйлдэл дээр нь илрүүлжээ. Сэжигтэн Н, Ө, Б нарыг автобусанд зорчиж явсан эмэгтэйн түрүүвч, олон нийтийн газраар зорчиж байсан иргэний гар утас хулгайлсныг цагдаагийн алба хаагчид баримтжуулан, ажилласан байна.

Эмэгтэйн түрүүвчинд 80 мянган төгрөг, иргэний үнэмлэх бичиг баримт, банкны карт байсан бөгөөд эд зүйлийг бүрэн бүтнээр нь олж өгч, иргэнийг хохиролгүй болгожээ.

Сэжигтнүүд нь автобусны буудал, олон нийтийн газар тэнэмэл байдлаар бүлэглэн явж, иргэдийн анхаарлыг сарниулан эд зүйл, гар утас хулгайлдаг байжээ. Мөн олон удаагийн ял шийтгэлтэй, орлогын эх үүсвэр, тогтсон хаяггүй, бүлэглэн бусдын эд зүйлийг хулгайлдаг болох нь тогтоогдсон байна.