Дундговь аймгийн ХХАА-ын дэргэдэх Мал эмнэлэг, ариун цэврийн лабораторийн эмч нар ишиглэж чадахгүй, төллөлт удааширсан ямаанд кесарева хагалгаа хийжээ. Ийм төрлийн хагалгааг 2013 оноос эхлэн хийдэг болжээ.

Хагалгааны талаар лабораторийн эрхлэгч А.Оюунцэцэг “Урьд нь эргүүтсэн малд хагалгаа хийж эдгээсэн олон удаагийн туршлага бий. Мал төдийгүй аргальд ч ийм хагалгаа хийж, сүрэгт нь нийлүүлж байсан удаатай.

Харин бэрхэтсэн малд кесарева хагалгаа хийх талаар 2013 онд малын эмч нарт сургалт явуулснаас хойш манай лабортори кесарева хагалгаа хийдэг болсон. Гэхдээ ийм хагалгаа хийх тохиолдол жилд тийм ч олон бус байдаг. Бэрхэтсэн ингэ, үнээ, гүүнд хийсэн кесарева хагалгаа хийсэн хэд хэдэн удаагийн тохиолдол байгаа” гэжээ.

Дээрх хагалгааны хувьд тодруулахад, Сайнцагаан сумын малчин хээлийнх нь ус гараад хэд хоносон ч төллөж чадахгүй удааширсан ямаагаа өөрөө лабораторид авчирч, малын эмч нарын тусламжийг ийнхүү авчээ. Гэхдээ ишиг нь хэвлийдээ үхсэн байсан бөгөөд эх ямаа тэнхрэн ижил сүрэгтээ нийлжээ.