Өмнөговь аймгийн нутаг дэвсгэрт нүүрс тээвэрлэж явсан жолооч нар амиа алдсан талаар бид мэдээлсэн. Тэгвэл гурван жолооч амиа алдаж, нэгнийх нь бие хүнд байна. Эдгээр жолооч нар “Санхэ” гэх хятад компанид ажилладаг аж. Долоон жолооч энэ сарын 8-ны өдөр Таван толгойгоос 90 км-ийн зайд орших нутгийн иргэдийн нэрлэдгээр “90-ийн гуанз”-нд хоол идэж, нэг шил архи хувааж уусан байна.

Тэднээс хоёр нь үлдэж, бусад нь Гашуунсухайтын боомт руу явжээ. Гэвч үлдсэн хоёр  жолооч нь удалгүй “90-ийн гуанз”-ны ойролцоо амьсгал хураажээ. Харин Гашуунсухай боомт руу явсан жолооч нарын нэг нь Ханбогд сумын Хайрхан багт /Цагаан хад/ ирээд амьсгал хураасан байна. Амиа алдсан жолооч нартай хамт архи уусан гурван жолоочийн нэгнийнх биеийн байдал хүнд байгаа бөгөөд тэд одоо аймгийн нэгдсэн эмнэлэгт эмчлүүлж байгаа аж.

Эдгээр жолооч нар ямар архи уусан нь тодорхойгүй байгаа бөгөөд саван шиг амттай, шар өнгөтэй архи уусан гэх мэдээлэл байна. Энэ талаар амиа алдсан жолооч нас барахаасаа өмнө хэлжээ. Амиа алдсан жолооч нарын цогцост задлан шинжилгээ хийж байгаа бөгөөд дүгнэлт нь хараахан гараагүй байгаа аж. Мөн энэ үйл явдалтай холбоотойгоор Өмнөговь аймгийн Ханбогд сумын Хайрхан багийн нутаг дэвсгэрт өндөржүүлсэн бэлэн байдал зарлаж, архи согтууруулах ундаа худалдан борлуулахыг түр хугацаагаар хоригложээ.