“Чингис хаан” нисэх онгоцны буудлын орчимд өчигдөр АНУ-ын цэргийн онгоц ослын буулт хийсэн талаар бид мэдээлсэн.  Тэд хэдийгээр ослын буулт хийсэн ч амжилттай газардсан. Шалтгаан нь АНУ-ын цэргийн зориулалттай, С-17 маркийн ачааны нисэх онгоцны нэг хөдөлгүүр бүрэн зогсож, ажиллагаагүй болжээ. Онгоц Катараас нислэг үйлдэж явсан бөгөөд нислэгийн чиглэлийн талаар тодорхой мэдээлэл байхгүй байна. Эх сурвалжийн мэдээлж байгаагаар дээрх онгоц энхийг сахиулагчдын ачааг тээвэрлэж явжээ.

Тус онгоц Улаанбаатар хотод буух хуваарьгүй байсан бөгөөд манай улсын дээгүүр нисч явахад нь дөрвөн хөдөлгүүрийн нэг нь ажиллагаагүй болсон тул зөвшөөрөл хүсч, Улаанбаатарт 13:59 цагт газардсан байна. АНУ-ын цэргийн зориулалттай уг онгоцны  экипаж 8 хүний бүрэлдэхүүнтэй байжээ.

Онгоцыг аюулгүй буулгахын тул Чингис хаан нисэх онгоцны буудлын аюулгүйн алба шуурхай хуралдаж, бүх талын арга хэмжээг авчээ. Тодруулбал, тус буудлын аюулгүйн алба, цагдаа, хилийн албаны шуурхай бүрэлдэхүүн хуралдаж, хамгаалалт авсан байна.

Энэ талаар Иргэний нисэхийн ерөнхий газар “Тус газраас "Катараас нислэг үйлдэж байсан АНУ-ын цэргийн зориулалттай С17 маягийн агаарын хөлгийн дөрвөн хөдөлгүүрийн нэг нь ажиллагаагүй болсон тул зөвшөөрөл хүсч, Улаанбаатарт 13:59 цагт газардсан. АНУ-ын цэргийн зориулалттай уг онгоцны  экипаж 8 хүний бүрэлдэхүүнтэй байсан. "Чингис хаан" олон улсын нисэх буудлынхан бэлэн байдлыг хангаж ажиллалаа.

Одоо нисэх буудлын үйлдвэрлэлийн үйл ажиллагаа хэвийн үргэлжилж байна. Онгоц одоо Улаанбаатарт байгаа. Засварын хийж, нисэх боломжтой болсон үед хөөрнө" хэмээн мэдээллээ. Одоогоор зорчигчдыг амрааж, онгоцыг засах ажлыг эхлүүлж, хөдөлгүүр зогссон шалтгааныг тогтоохоор ажиллаж байгаа бөгөөд Монгол улсын Батлан хамгаалах яам болон АНУ-аас Монгол улсад суугаа Элчин сайдын яамны тодорхой албан тушаалтнууд байдалтай танилцаж, онгоцыг хүлээн авсан байна.

24tsag.mn