Өнгөрсөн есдүгээр сарын 6-7-нд шилжих шөнө Дорнод аймгийн Хэрлэн сумын харьяат, долоон настай Т гэх хүү бусдын гарт харамсалтайгаар амиа алдсан хэрэг гарсан. Түүнийг төрсөн эцгийнх нууц амраг хөнөөлгөсөн нь мөрдөн байцаалтын явцад тогтоогдсон.

Тодруулбал талийгаач хүүгийн эцэг, Дорнод аймгийн Хэрлэн сумын харьяат Ц нь 1992 онд төрсөн С гэгчтэй хувийн дотно харилцаатай байсан. С нь Ц-г гэр бүлээс нь салгах зорилгоор тус суманд оршин суугч Б-д мөнгө амлаж, захиалгаар хүүг хөнөөлгөсөн нь тогтоогдоод байгаа юм. Хүүгийн аминд хүрсэн Б нь 1998 онд төрсөн, 18 настай, өнгөрсөн жил арван жилийн сургууль төгсөөд, тодорхой эрхэлсэн ажилгүй байжээ.

Тэрээр 2016 онд Эрүүгийн хуулийн 145.2 буюу хоёр удаагийн хулгайн хэргээр хоёр жилийн хорих ялаар шийтгүүлж, хоёр жилийн тэнсэнтэй байсан аж. Түүнд Эрүүгийн хуулийн 91.2.3, 91.2.11, 91.2.15, хүүг хөнөөсөн Барсболдод Эрүүгийн хуулийн 145.2, 91.2.4, 91.2.11, 91.2.15-д үндэслэн прокурорын байгууллагаас яллах дүгнэлт үйлдэж өчигдөр шүүхэд шилжүүлжээ. Одоогоор шүүх хурлын тов гараагүй байна.