Баянзүрх дүүргийн нутаг, Үндэсний цэцэрлэгт хүрээлэнгийн баруун урд, Маршалын гүүрний хойд талд байдаг дулааны худаг буюу олны нэрлэж заншсанаар траншейнд хоёр хүний амь нас хохирсон хэрэг хоёрдугаар сарын 12-нд гарсан талаар бид мэдээлсэн.

Энэ хэргийг Баянзүрх дүүргийн 10 дугаар хороонд оршин суудаг явдаг 28 настай Батцэнгэл гэгч хамтран амьдрагч 32 настай Э-гийнхаа хамт үйлдсэн болохыг тус дүүргийн Цагдаагийн I хэлтсийнхэн тогтоож, тэд дахин нэг хүний амь насыг бүрэлгэсэн болохыг давхар тогтоосон. Гэвч  эхнэр, нөхөр хоёр цуврал аллага үйлдсэн байжээ. Прокурорын байгууллагын эх сурвалжийн хэлснээр Хан-Уул дүүргийн нутаг, Зайсан толгой орчимд хоёрдугаар сарын 12-ноос өмнө нэг эр бусдад хорлогдон амиа алдсан байж.

Тус дүүргийн Цагдаагийн I хэлтсийнхэн гэмт этгээдийг эрэн сурвалжилж байтал дээрх хоёр цуврал хэрэг гарсныг Баянзүрх дүүргийн Цагдаагийн хэлтсийнхэн илрүүлжээ. Шалгалтын ажиллагааг үргэлжлүүлж байхад сэжигтэн Батцэнгэл Зайсан толгой орчимд хүн хөнөөснөө ярьсан аж. Талийгаач нь сэжигтэнтэй цуг явж гурван хүн егүүтгэхэд оролцсон Э-тай өмнө нь хамтран амьдарч байсан нэгэн юм байна.