Гэр хорооллын дахин төлөвлөлтөд хамруулах нэрээр орон байраа булаалгаж, гудамжинд гараад буй гэх, Баянзүрх дүүргийн “Сансар” хотхоны 85 өрхийн 500 гаруй иргэнийг төлөөлж “Сансар хотхоны иргэдийн эрх ашгийг хамгаалах холбоо” ТББ-ынхан мэдээлэл хийжээ. Тус хотхоны нийтийн орон сууцны долоон байр, амины зургаан орон сууц гэр хорооллын дахин төлөвлөлтөд оржээ. Улмаар оршин суугчид 2014 оны гуравдугаар сард төсөл хэрэгжүүлэгчээр шалгарсан “Их өргөө” ХХК болон нийслэлийн Гэр хорооллын хөгжлийн газартай гэрээ байгуулан орон сууц, дэлгүүрийн барилгуудаа чөлөөлж, хүлээлгэн өгсөн байна.

Гэрээ ёсоор бол “Сансар” хотхоныхон 2015 оны III улиралд шинэ байрандаа орох байжээ. Мөн газар чөлөөлсөн өдрөөс эхлэн “Их өргөө” компаниас оршин суугчдад сар бүр 500 мянган төгрөгийн нөхөн олговор өгнө гэж гэрээнд тусгажээ. Гэвч тус газарт гурван орон сууцны барилгын суурийг цутгаснаас өөр ажил өдий хүртэл хийгээгүй бөгөөд нэг ч иргэн нөхөн олговор аваагүй гэнэ.

Орон гэрээ алдсан иргэд нийслэлийн удирдлагууд болон төсөл хэрэгжүүлэгч компанид энэ асуудлаар удаа дараа хандсан ч тусыг эс олоод байгаа бөгөөд оршин суугчид өдгөө Ерөнхий сайдад албан бичиг хүргүүлжээ. Долоо хоногийн дотор ямар нэг хариу өгөхгүй бол өлсгөлөн зарлахад бэлэн гэдгээ энэ үеэр мэдэгдлээ.  “Их өргөө” компанийг үүсгэн байгуулагч, УИХ-ын гишүүн асан Д.Арвинтай уулзахад “Нөхөн олговор өгөх боломжгүй, мөнгө байхгүй” гэж зандардаг аж.