"УБТЗ" ХНН БНХАУ-ын Тяньжины далайн боомт хүрэх нүүрс тээвэрлэлтийг хийж, улс орноо эдийн засгийн хүндрэл бэрхшээлээс гаргахад бодит хувь нэмрээ оруулсаар байна. 

Монгол Улсаас БНХАУ-ын Тяньжин далайн боомт хот хүрэх нүүрс ачсан галт тэрэгний анхны цуваа /2017.03.23/ хөдөллөө. Дорноговь аймгийн Даланжаргалан сумын нутаг, Улаанбаатар төмөр замын гол замын 718 дугаар км-т байрлах Олон-Овоо өртөөнөөс анх удаа нээлттэй чингэлгээр нүүрс тээвэрлэх боломжтой болж байгаа нь энэ юм. Эндээс ачсан нүүрс шууд Тяньжины далайн боомтод очиж, түүхийн эдийн биржээр зарагдах юм. Өмнө нь нүүрсээ Эрээн  руу гаргаж зардаг байсан бол энэ удаа 3 дахь зах зээлд үнэ хүргэж зарах боломж нээгдэж байгаа юм. Ийм боломжийг бүрдүүлэхийн төлөө “УБТЗ” ХНН ихээхэн хүчин чармайлт гарган ажиллажээ.

       “Улаанбаатар төмөр зам” ХНН үйлчлүүлэгч түншүүдийнхээ хүсэлтийг биелүүлэх үүднээс нурмаг ачааны шинэ терминалыг барьж байгуулснаа мөн энэ үеэр нээсэн юм. Энэхүү терминалын 2 дахь шатны ажил энэ оны 6 дугаар сард хийгдэж дууссанаар  Олон-Овоо өртөөгөөс хоногт 200-300 вагон нүүрс экспортод ачих бололцоотой болох юм. Тус өртөө нь ачилтын томоохон цэг болж байгаа бөгөөд тус бүр нь 10 сая тонны нөөцтэй 3 нүүрсний уурхай эндээс холгүй олборлолт хийж байгаа бөгөөд зөвхөн эдгээр уурхайн экспортын тээвэрлэлтийг хийхэд л “УБТЗ” ХНН-ийн ачаа тээвэрлэлт 8 сая тонноор нэмэгдэх тооцоо байна.

    “Олон-Овоо” өртөөнөөс БНХАУ-ын Тяньжин боомт руу аялах нүүрс тээврийн анхны галт тэргийг үдэх ёслолын арга хэмжээнд. Зам тээврийн хөгжлийн сайд Д.Ганбат, БНХАУ-аас Монгол Улсад суугаа Элчин сайдын яамны Элчин зөвлөх Ян Чин Дун,  Монгол-Оросын хувь нийлүүлсэн нийгэмлэг УБТЗ-ын дарга Д.Жигжиднямаа, Ерөнхий инженер А.Р.Мешеряков нар болон Дорноговь аймгийн нутгийн удирдлага, нүүрсний уурхайн төлөөлөл оролцлоо.