Монголоос хулгайлагдан дуудлага худалдаанд орсон ч шүүхийн шийдвэрээр буцаагдсан 70 сая жилийн настай Тарбозавр Батаар үлэг  гүрвэлийн олдворыг албан ёсоор хүлээж авах ёслолын ажиллагааг Монгол Улсын Ерөнхийлөгчийн Тамгын газар, Засгийн газар хамтран АНУ-ын Нью-Йорк хотын ONE UNITED NATIONS PLAZA зочид буудлын “Manhattan Room” танхимд зохион байгуулж байсан цаг саяхан.

Тэгвэл монголоос хулгайгаар хил давуулсан үлэг гүрвэлийн олдворуудыг буцаан өгөхөөр болсноо Өмнөд Солонгосын улсын өнөөдөр прокурор зарлажээ. Эх орноосоо хулгайлагдсан бас нэгэн Тарбозавр батаар буцаж ирэхээр болсон байна.

Өнгөрсөн баасан гарагт тус улсын ерөнхий прокурорын газарт 2014 оны тавдугаар сард нэг монгол, хоёр солонгос иргэний хамтран хил давуулсан олдворуудыг Монголын талд хүлээлгэн өгөх ёслол болсон байна. Олдворуудын дотор зөвхөн Монголоос олддог Тарбозавр батаарын яс, үлэг гүрвэлийн өндөг, протоцератопын яс зэрэг багтжээ.

Өмнөд Солонгосын Засгийн газар анх удаа нутагтаа орж ирсэн өөр улсын соёлын дурсгалыг буцаан хүлээлгэж өгч байгаа тохиолдол энэ юм байна. Монголын Засгийн газар хариу талархал илэрхийлээд олдворуудыг Өмнөд Солонгост удаан хугацаагаар түрээслүүлж, иргэдэд нь үзүүлэх санал тавьсан гэнэ.

Хэр удаан хугацаанд, хаана олдворуудыг үзүүлэхээ удахгүй шийднэ гэж прокурорын газраас мэдээлсэн байна.