Өнөөдрийн байдлаар Дундговь аймгийн Сайнцагаан сумын Далай багийн нутаг Арвижихын голын адагт хязгаарлалтын, Хулд сумын Олдох багийн нутаг Олгойн худаг хэмээх газар хорио цээрийн дэглэм үргэлжилсэн хэвээр байна.Хорио цээрийн дэглэмийн бүсэд хамаарч байгаа Олдох багийн 547 үхэр болон тэмээнд галзуугийн эсрэг вакцин тарьж дууссан гэж ХХАА-н газрын Мал эмнэлэгийн албаны дарга М. Хүүбаян хэллээ.
Өнгөрсөн зун, намар, өвлийн саруудад Дундговь аймгийн ихэнх сумын нутаг дэвсгэрт малын гоц халдварт цэцэг өвчний голомт үүсч, хорио цээрийн дэглэм үргэлжилсэн. Хонины цэцэг өвчнийг залгаад үхрийн дуут хавдар болон галзуу өвчин гарч эхэлсэн бөгөөд үхрийн дуут хавдар эхэлж гарсан Баянжаргалан сумын Шилийн гол хэмээх газар хязгаарлалтын дэглэм тогтоож 200 гаруй үхрийг вакцинжуулан, хязгаарлалтын дэглэмийг буулгасан байна. Одоо Сайнцагаан, Хулд сумын нутагт хязгаарлалтын болон хорио цээрийн дэглэм ийнхүү үргэлжилж байгаа юм.
Энэ бүсэд хамаарч байгаа малын вакцинжуулалт дууссан бөгөөд малын шилжилт хөдөлгөөнд тавих хяналтыг үргэлжлүүлж байна. Өвчний шинж тэмдэг дахин илрээгүй гэдгийг Мал эмнэлэгийн албанаас мэдээлсэн.
Хонины цэцэг өвчний эсрэг вакцинжуулалтын хувь 10 сумын хонин сүргийг бүрэн вакцинжуулсан. Энэ сард үргэлжлүүлэн Өлзийт, Өндөршил, Сайнцагаан, Дэрэн, Гурвансайхан сумын 480 гаруй мянган хонинд вакцин тарьж байна. Ингэснээр энэ жилийн шинэ төлөөс бусад бүх хонин сүрэг, тодруулбал 1 сая 400 гаруй мянган хонинд цэцэг өвчний эсрэг дархлаа тогтож байгаа гэлээ.
