Зэвсэгт Хүчний Жанжин Штабаас Таван толгойн цэргийн ангид гарсан ослын талаар мэдээлэл өглөө. Мэдээллийн үеэр ЗХЖШ-ын  орлогч дарга, хошууч генерал Б.Бадамбазар “2017 оны 4 сарын 11-ны өдөр болсон ослын талаар мэдээлэл танилцуулах гэж байна.  Ослын талаарх мэдээллийг 17 цаг 40 минутад авсан.  ЗХЖШ-ын  350 дугаар ангид төлөвлөгөөний дагуу хээрийн сургуулилтын үеэр гранат дэлбэрч хоёр цэрэг нас барж, найман цэрэг шархдсан хэрэг гарлаа.

Албан үүргээ гүйцэтгэж яваад амиа алдсан Б.Мөнгөншагай, Б.Ариунболд нарын гэр бүлд Зэвсэгт Хүчний Жанжин Штабын зүгээс гүн эмгэнэл илэрхийлж байна. Хээрийн бэлтгэлийг жилд хоёр удаа буюу хавар, намрын цагт хийдэг. Ослын шалтгааныг хууль хяналтын байгууллагууд шалгаж байна. Осол гарсантай холбогдуулан Батлан хамгаалах яам, ЗХЖШ-аас хоёр ажлын хэсэг байгуулагдсан. Нэгдүгээр ажлын хэсэг ослын байдлыг тодруулах, Төв аймгийн цагдаагийн байгууллагатай хамтарч ажиллах үүргийг хэрэгжүүлсэн бол хоёрдугаар ажлын хэсэг шархдсан 8 цэргийн албан хаагчийг УБ хот руу зөөвөрлөх, Цэргийн төв эмнэлэгт үзлэг шинжилгээ хийх, хагалгаанд бэлтгэхээс гадна ар гэрийнхнийг нь хариуцаж ажилласан” гэлээ.

Хээрийн сургуулилтын үеэр амиа алдсан офицер Б.М 30 настай, зэвсгийн албаны офицер аж. Тэрээр Төв аймгийн Баянсан сумын харъяат, эхнэр таван настай хүүгийнхээ хамт амьдардаг байсан гэнэ. Харин талийгаач ахлагч А нь ротынхоо хамгийн залуу буюу 24 настай байжээ. Баян-Өлгий аймгийн харъяат тэрээр ээж, эхнэр, дөрвөн сартай хүүгийнхээ хамт амьдардаг байсан аж. Мэргэжлийн ахлахын сургуулийг 2002 онд төгссөн.

Тэд хоёул  Өмнөд Судан улсад албан хаасан цэргүүд байжээ. Харин шархдсан цэргүүдийн хувьд 22-28-ны насны бүгд мэргэжлийн ахлах бэлтгэх сургууль төгссөн цэргүүд байсан байна.

Цэргийн төв эмнэлгийн өгсөн мэдээллээр өчигдөр хоёр цэргийн албан хаагчдад яаралтай хагалгаа хийсэн. Мөн бусад шархдсан цэргүүдэд цаг алдалгүй эмчилгээ хийгдсэн учир одоогийн байдлаар биеийн байдал нь хэвийн байгаа аж. Мөн тухайн ослын газар нийт 25 цэргийн албан хаагч байснаас ослын дараа үзлэгт хамруулж, ил шархгүй ч зовиуртай байгаа цэргүүдэд нарийн мэргэжлийн шинжилгээ хийсэн байна.

Ослын талаар ЗХЖШ-ын  орлогч дарга, хошууч генерал Б.Бадамбазар “Ослын шалтгааныг Төв аймгийн Цагдаагийн газар тодруулахаар ажиллаж байна. Бид цагдаагийн байгууллагын мэдээллийг л хүлээж байна. Зарим шархдсан цэргийн албан хаагчдаас мэдүүлэг авсан. Сургуулилт бол ном дүрэм журмын дагуу явагдсан.  Үүнтэй холбогдуулан осол болсон газрын үйл ажиллагааг зогсоосон. Мөн бусад цэргийн ангиудад хяналт тавих ажиллагаа явагдаж эхэлсэн.

Ослын дүгнэлт гарсны дараа хариуцлагаа хүлээхэд бэлэн байна. Зэвсэгт Хүчний Жанжин Штабд хариуцлагаа шат шатандаа хүлээгээд явна.

Ослын дүгнэлт гарсны дараа хариуцлагаа хүлээхэд бэлэн байна. Зэвсэгт Хүчний Жанжин Штабд хариуцлагаа шат шатандаа хүлээгээд явна. Зэвсгийн хадгалалт нь шаардлагын дагуу байсан. Учир нь манай нийт обьектуудын насжил өндөр байдаг учраас онцгой журам үйлчилдэг. Энэхүү ажиллагааг ахалж байсан хүн нь офицер Б.Мөнгөншагай байсан” гэлээ.

Үүрэг гүйцэтгэж явахдаа хэрвээ цэргийн албан хаагч амь эрсдвэл тэтгэвэр, тэтгэмжийн асуудлыг нь тодорхой заасан байдаг аж. Өөрөөр хэлбэл 10 жилийн үндсэн цалинтай тэнцэх тэтгэмжийг олгодог байна. Хэрвээ тухайн гэр бүлд хөдөлмөрийн чадваргүй иргэн байвал тэжээгчээ алдсны тэтгэвэр олгоно гэнэ. Тиймээс өнөө өглөө Зэвсэгт Хүчний Жанжин Штаб энэ тэтгэмжийг олгохоор шийдвэрлэснийг хурлын үеэр онцоллоо.

24tsag.mn