Төв аймгийн Батсүмбэр сумын ерөнхий боловсролын сургуулийн бага ангийн сурагчид хоолондоо хордож, нэг нь Сонгинохайрхан дүүргийн эмнэлэгт эмнэлгийн тусламж авсан ч нас барсан харамсалтай хэрэг гарсан.

МХЕГ-ын эх сурвалжийн хэлснээр “Хүүхдүүд байрандаа өдрийн, оройн хоол иддэг юм билээ. Өдрийн хоолоо идээд удалгүй нэг нь бөөлжиж суулгац өгч эхэлсэн. Сургуулийн зүгээс хордлогын шинж тэмдэг илэрсэн тул харьяаллын дагуу яаралтай Сонгинохайрхан дүүргийн нэгдсэн эмнэлэгт хүргэсэн юм билээ.

Харин тус эмнэлгийн зүгээс халдвар хордлого гэсэн онош тавьж ХӨСҮТ рүү явуулсан. Гэвч хүүхдүүдийн ээж ХӨСҮТ оролгүй гэртээ хүүхдүүдээ авчирч хонуулсан бөгөөд бага нь бөөлжиж, гүйлгэж таталт өгч эхлэнгүүт Түргэн тусламж дуудсан ч тусламж авч чадалгүй нас барсан. Хоёр хүүхдийг ХӨСҮТ-д хордлого тайлах эмчилгээ хийж байна. Биеийн байдал нь дээрдэж байна” гэв.