Замын цагдаагийн албаны жижүүрийн шуурхай удирдлагын хэлтэст өчигдөр нийт 361 дуудлага, мэдээлэл ирсэн байна. Есөн хүн зам тээврийн ослын улмаас гэмтэж бэртсэний хоёр нь бага насны хүүхэд байжээ. Тодруулбал өчигдөр  10 настай хүү асран хамгаалах хүнгүй явж байсны улмаас согтууруулах ундаа хэрэглэсэн жолоочийн машинд мөргүүлж, бэртсэн байна. 

Зам тээврийн осолд өртсөн хоёр хүүхэд Гэмтэл, согог судлалын үндэсний төвд эмчлүүлж байгаа аж. Энэ талаар Замын цагдаагийн газраас "Эцэг, эхийн хараа хяналт суларсан нь үүнтэй холбоотой. Тухайлбал, эцэг эхчүүд хүүхдээ нэгдүгээр анги хүртэл нь сургуульд хүргэж өгч, авдаг бол хоёр, гуравдугаар ангиас эхлэн хүүхдийг бие даалгаж, ганцааранг нь явуулдаг. Энэ нь хүүхэд осолд өртөх магадлалыг нэмэгдүүлж байна. Манайханд ажиглагддаг бас нэг том алдаа байна. Жишээ нь, бага насны хүүхдийг өөрөөс нь ганц хоёр насаар ах, бага насны хүүхдээр авхуулдаг. Багш нар нь ч бас бага насны хүүхдэд хүүхэд хүлээлгэж өгдөг. Энэ маш буруу” гэх тайлбарыг өгчээ.

2017 оны эхний гурван сарын байдлаар 172 хүүхэд зам тээврийн осолд өртсөн байна. Үүнээс 34 хүүхэд хүнд болон хөнгөн гэмтэл авсан бөгөөд 13 хүүхэд амь насаа алдсан гэсэн мэдээллийг Замын цагдаагийн албанаас өглөө.