“Ард түмний онц түр зөвлөл” төрийн бус байгууллагаас зохион байгуулсан “Хуулиа дээдэлье, оффшорчдыг шалга” жагсаал, цуглаан суултаар үргэлжилж байгаа билээ.  Тодруулбал өнгөрөгч бямба гаргийн 14:00 цагт болсон уг жагсаалд оролцогчид  Монгол Улсын Үндсэн хуульд заасан үг хэлэх эрхээ эдэлж, ардчилсан нийгэмд амьдарч байгаагаа тунхаглан үзэл бодлоо нууж хаах, айж эмээх зүйлгүй чөлөөтэй илэрхийлсэн ч 18:00 цагаас хойш хэсэг хүн үлдэж суулт эхлүүлсэн юм.

Тэгвэл Сүхбаатарын талбай дээр суулт зарлаж буй иргэдийн нэгнийх нь бие мууджээ. Улмаар тус иргэн эмнэлэгт хүргэгдсэн байна. Тус суултыг цагдаагийн байгууллагаас хууль бус хэмээн мэдэгдээд байгаа юм.

Учир нь жагсаал, цуглаан хийх журмын тухай хуулийн есдүгээр зүйлийн 9.1-т “Гудамж, талбайд жагсаал, цуглаан хийх тухай мэдэгдлийг сум, дүүргийн Засаг даргад өгч бүртгүүлнэ. Жагсаал, цуглаан хийхээр төлөвлөсөн гудамж, талбай нь хоёр буюу түүнээс дээш сум, дүүргийн хилийн цэст хамаарах газар нутгийг хамарч байгаа бол мэдэгдлийг аймаг, нийслэлийн Засаг даргад өгч бүртгүүлнэ” гэж заасныг зөрчсөн гэж тэд үзэж байгаа юм.