Ажлаас халагдсан эмэгтэй өөрийгөө шатааж амиа хорлосон харамсалтай хэрэг Завхан аймгийн Идэр суманд гарсан билээ. Тодруулбал, 40 орчим настай Т гэгч эмэгтэй өөр лүүгээ бензин цацаж амиа хорлосон.

Талийгаач тус сумын Засаг даргын Тамгын газарт төрийн сангийн мэргэжилтнээр 28 жил ажилласан бөгөөд гэнэт ажлаасаа халагдсны улмаас өөрийгөө шатааж амиа хорлосон талаар ар гэрийнхэн нь мэдэгдсэн. Тэгвэл тус суманд дахин нэг иргэн өөрийгөө шатаасан хэрэг гарчээ. Тодруулбал энэ сарын 16-наас 17-нд шилжих шөнө 02-03 цагийн орчимд Идэр сумын иргэн 46 настай Б гэгч эрэгтэй эзэнгүй байсан айлын гэрт шатаж, угаартсан байдалтай амь насаа алджээ.

Гэрчүүдийн хэлснээр тухайн айл эзэнгүй байсан гэнэ. Амиа егүүтгэсэн этгээд тус айлын тооноор нь оржээ. Шөнийн 02-03 цагийн үед айл шатсан дуудлага ирсэн байна. Дуудлагын дагуу хэргийн газарт очиход хүний шатсан цогцос олджээ. Хэргийг Завхан аймгийн цагдаагийн газар шалгаж байна.