“Монгол-Германы Гүүр” ТББ нь гадаадад төгсөгч залууст зориулан “Career expo-2017”-г 8 дахь удаагаа зохион байгуулах гэж байна. Энэ удаагийн хөдөлмөрийн үзэсгэлэн яармагийг “Монголын Хүний нөөцийн удирдлага бүтээмжийн менежментийн академи” ТББ-ын дэргэдэх “Эйч-Ар” клубтэй хамтран эх орныхоо өмнө тулгамдаж буй асуудлыг шийдвэрлэхэд хувь нэмэр оруулах үүднээс хилийн чанадад мэргэжил эзэмшсэн, төгсөгч залуусын оюуны чадавхи, шилжилт хөдөлгөөнийг эх орондоо татах зорилгоор зохион байгуулж байгаа юм.

Энэхүү яармагийн гол зорилго нь Монгол Улсын хөдөлмөрийн зах зээлийн өнөөгийн хөгжил, чиг хандлага, байгууллагуудын хүний нөөцийн эрэлт хэрэгцээг тодорхойлох, ажил олгогч байгууллагуудыг сурталчлах, нөгөө талаас өндөр хөгжилтэй оронд төгсөгчдийг ажил олгогчтой холбох, ажлын байранд зуучлахад оршино.

“Career Expo–2017” арга хэмжээ нь 2017 оны 4 дүгээр сарын 22-ны өдөр Blue Sky Tower-т болох бөгөөд үндсэн гурван хэсгийн хүрээнд болно. Тодруулбал “Ажил олгогч ба ажил горилогч” сэдэвт хэлэлцүүлэг, “Эх орондоо илүүг бүтээцгээе” уриатай Хөдөлмөрийн үзэсгэлэн яармаг, “ВИП” үзэсгэлэн яармагаар үргэлжилнэ.

Иймээс ажил хайж буй гадаадад төгсөгчид болон ажил олгогч нарыг “Career Expo-2017”-д өргөнөөр оролцож бидэнтэй хамтран ажиллахыг уриаллаа.