Цагдаагийн алба бол төр ард түмнийхээ өмнө тангараг өргөж, гэмт хэрэгтэй тэмцэх нийгмийн хэв журам сахиулах хүндтэй бөгөөд амаргүй ажил билээ. Зөвхөн иргэдийнхээ төлөө гэсэн зүрхний дуудлагатай цагдаагийн шилдэг алба хаагчид өчигдөр мэргэжлийн ур чадвар, авхаалж самбаа, тэс тэвчээрээрээ өрсөлдлөө.

Улаанбаатар цагдаагийн хүрээний “Марш тактик-2017” цогцолбор тэмцээн Цагдаагийн ерөнхий газрын Сургалтын нэгдсэн төвийн “Нарстай ам” дахь хээрийн сургалтын хэсэгт 19 дэх жилдээ зохион байгуулагдаж, бие бүрэлдэхүүний бэлэн байдлаа мөр зэрэгцэн ажиллаж буй алба хаагчдадаа шалгууллаа. Тэмцээний нээлтэд ЦЕГ-ын дарга, хурандаа Ө.Энхтөр, ЦЕГ-ын Тэргүүн дэд дарга, хурандаа П.Батбаатар, ЦЕГ-ын дэд дарга, хурандаа М.Лувсандорж, ЦЕГ-ын дэд дарга, хурандаа Ч.Болдбаатар, Нийслэлийн цагдаагийн газрын дарга Ж.Эрдэнэболд болон бусад албаны хүмүүс оролцож, цагдаагийн байгууллагын тактик, тэдгээрийн үйл ажиллагааг хангах хүрээнд зохион байгуулагдаж байгаа тэмцээндээ амжилттай оролцохыг хүслээ.

Энэ удаагийн тэмцээнд Мөрдөн байцаах алба, Эрүүгийн цагдаагийн алба, Хэрэг бүртгэх алба, Замын цагдаагийн алба, Нийслэлийн Цагдаагийн газрын нэг, хоёрдугаар салаа, ЦЕГ-ын Автобааз, ОНАБХГ-ын Хамгаалалтын хоёр, гуравдугаар газар, Нийтийн хэв журам хамгаалах газар болон Төмөр зам дахь Цагдаагийн газар, Иргэний агаарын тээврийн цагдаагийн хэлтсийн хамтарсан баг буюу нийт 11 газар, хэлтсийн 200 гаруй алба хаагчид өрсөлдсөн юм.

Тамирчид буюу алба хаагчид 7 цэг дээр цагдаагийн үндсэн үүргүүдийг багтаасан 27 дасгалыг 10 гаруй кг-ын жинтэй хуяг дуулгатайгаа 8,5 км зам туулж гүйцэтгэж байгаа нь тамирчдын хүч тэнхээ, тэсвэр тэвчээрийг бодитойгоор шалгаж байлаа. Гэвч хүнд бэрх даваануудыг багын хүчээр, нийтийнхээ төлөө гэсэн сэтгэлээр, салаан даргынхаа удирдлага дор бүгд нэг хүн шиг гүйцэтгэж, цагдаагийн алба хаагчийн тэсвэр тэвчээрийг харуулан барианыхаа шугамд орж байгаа нь өөрийн эрхгүй бахархах сэтгэгдэл төрүүлж байсан юм. Ялангуяа эрэгтэйчүүдтэйгээ зэрэгцэн дасгал болгоныг чадварлагаар туулж байсан эмэгтэй алба хаагчид энэ өдрийн баатрууд байлаа.   

Үзэгчид болоод хөгжөөн дэмжихээр ирсэн алба хаагчдын хамгийн их сонирхол татсан энэ хэсэг нь гарааны өмнөх тэмцээний нэг хэсэг болох гардан тулааны үзүүлбэр байв. Баг тамирчид халдагч этгээдийн дайралтыг хэрхэн зөв техникээр зогсоох болон галт зэвсэгтэй хэрхэн харьцах талаар тоглолт үзүүлсэн юм. Мөн дайчлан баривчилж, хутгалан хүргэх ажиллагаа буюу автомашин, автобус буюу нийтийн тээвэрт халдагч этгээдийг хэрхэн зогсоох дасгалууд нь үзүүштэй байж, өнөөгийн нөхцөлд цагдаагийн бие бүрэлдэхүүн хэрхэн бэлэн байхыг харуулсан юм. Хэдийгээр манайд энэ төрлийн гэмт хэрэг бага гардаг ч эрсдэл өндөр байдаг тул заавал хийж гүйцэтгэх дасгалд оруулжээ.

ОНАБХГ-ын дарга, тэмцээний ерөнхий шүүгч хурандаа П.Энхтогтохоос тэмцээний явцын талаар тодрууллаа.

-Тэмцээний зохион байгуулалтын талаар мэдээлэл өгөөч. Оролцож байгаа газруудаас ямар нэгэн санал гомдол ирсэн үү?

- Монгол улсын Биеийн тамир спортын тухай хууль болон Цагдаагийн ерөнхий газрын даргын 33 тоот тушаалаар Улаанбаатар цагдаагийн хүрээний “Марш тактик-2017” цогцолбор тэмцээн болж байна. Тэмцээнд Улаанбаатар цагдаагийн хүрээний 11 анги, байгууллагын тамирчид оролцож байна. Одоогийн байдлаар оролцогчидоос ямар нэгэн санал гомдол, маргаан ирээгүй.  Зохион байгуулалт сайтай явагдаж байна.

- Тэмцээний ач холбогдлын талаар дурдвал?

- Цагдаагийн байгууллага хуулиараа  нийтийн хэв журам, олон нийтийн аюулгүй байдлыг сахин хамгаалах, хангах чиг үүргийг гүйцэтгэдэг. Энэхүү үндсэн үүргээ гүйцэтгэхэд, алба хаагчдын ур чадварыг дээшлүүлэхэд энэ тэмцээн ихээхэн ач холбогдолтой.  

- “Марш тактик” тэмцээнийг жил бүр уламжлал болгон явуулдаг. Тамирчдын ур чадвар хэрхэн өсч байна вэ?

- Энэ жилийн “Марш тактик” тэмцээн Монгол Улсын Ерөнхийлөгчийн нэрэмжит тэмцээний өмнө болж байгаагаар онцлог. Үе үеийн тэмцээн өрсөлдөөн ихтэй болдог. Түүнийгээ дагаад ур чадвар нь ч нэмэгддэг. Энэ жилийн тэмцээн ч гэсэн маш өрсөлдөөнтэй явагдаж байна. Шүүлтийн хувьд хүндрэлтэй зүйл ч гарч байгаа ч одоогоор гомдол санал ирсэн зүйлгүй байна.

Энэ удаагийн тэмцээн хэд хэдэн онцлогтой болж байгааг зохион байгуулагчид нь хэлж байлаа. Тодруулбал өмнөх тэмцээнүүдэд эмэгтэйчүүдийн багийг тусад нь гаргадаг байсан бол энэ жилээс эхлэн нэг багт 4-6 эмэгтэй байхаар зохион байгуулжээ. Ингэхдээ туулах замын уртыг 10 км байсныг 8,5 км болгож багасгасан байна. Түүнчлэн ирэх зургадугаар сард Монгол Улсын Ерөнхийлөгчийн нэрэмжит “Марш тактик”-ийн тэмцээн болох аж. Тус тэмцээнд цагдаагийн байгууллагаас нэг баг оролцох бөгөөд тамирчдаа энэ удаагийн тэмцээний шилдгүүдээр бүрдүүлэх гэнэ.

Тэмцээний онцлогын талаар болон гэмт хэргийн гаралтын тайлангийн талаар ЦЕГ-ын дэд дарга, хурандаа М.Лувсандоржоос тодрууллаа.

- Энэ жилийн тэмцээний онцлогийн талаар ярьвал?

- Цагдаагийн Ерөнхий газарт олон залуучууд ажилладаг. Тэдгээр алба хаагчдын ур чадвар, бэлэн байдлыг хангахад “Марш тактик”-ийн тэмцээн ихээхэн ач холбогдолтой. Олон жилийн уламжлалттай тэмцээн боловч сүүлийн гурван жил завсарласан. 2013 оноос зохиогдоогүй байж байгаад энэ жилээс дахин зохион байгуулагдаж байна. Ирэх зургадугаар сард болох Монгол Улсын Ерөнхийлөгчийн нэрэмжит “Марш тактик”-ийн тэмцээн оролцох шалгуур тэмцээн гэдгээрээ онцлог.

- Цагдаагийн бие бүрэлдэхүүний бэлэн байдлыг та хэрхэн дүгнэж байна вэ?

- Цагдаагийн байгууллага бэлэн байдалд ажиллах нь нэн тэргүүний үүрэг. Учир нь гэмт хэрэг, зөрчил өдөр, шөнийг ялгалгүй гардаг учраас ямар ч үед өндөр түвшинд байх ёстой. Миний хувьд цагдаагийн байгууллагын бэлэн байдал маш сайн байгаа гэж дотроо дүгнэдэг.

- 2017 оны нэгдүгээр улирлын гэмт хэрэг гаралтын тайлан гарсан байна?

- Тайлангаас харахад гэмт хэргийн гаралт 4,6 хувиар буурсан, хэргийн илрүүлэлт 5,6 хувиар өссөн дүн гарсан. Энэ нь өдөр тутмын үйл ажиллагаандаа маш зөв менежментыг хэрэгжүүлж ажилласны үр дүн гэж харж байна. Учир нь Цагдаагийн Ерөнхий газар саяхан бүтцийн том өөрчлөлт хийсэн. Нийт гэмт хэргийн 50 гаруй хувийг эзэлдэг Хулгайн гэмт хэрэгтэй тэмцэх газар мөн Хар тамхитай тэмцэх газрыг байгууллаа. Шинэ бүтэц зохион байгуулалт, ажлын арга барил үүнд нөлөөлсөн.

Ингээд тэмцээний дүн гарахад 1 дүгээр байранд Олон нийтийн аюулгүй байдлыг хангах газрын хамгаалалтын 2 дугаар баг,  2 дугаар байранд Нийтийн хэв журам хамгаалах газрын баг,  3 дугаар байранд Цагдаагийн Ерөнхий газрын автобаазын баг тамирчид орж цом, медаль, үнэ бүхий зүйлээр шагнууллаа.

24tsag.mn